Претседателката на Европската комисија Урсула фон дер Лaјен најави дека многу скоро, за неколку недела, нејзиниот тим ќе ја претстави новата методологија за проширувањето на ЕУ.
Претставувајќи ги приоритетите на хрватското претседателство пред Европскиот парламент, таа од Стразбур ги повика земјите членки на Унијата да останат посветени на прашањето на Западниот Балкан и неговата интеграција во ЕУ.
Таа посочи дека наредните шест месеци ќе бидат клучни за односите меѓу земјите од Западниот Балкан и Европската Унија.
„Ако сакаме Самитот ЕУ-Западен Балкан во Загреб да биде успешен, мораме да си ја завршиме домашната задача. Затоа, за неколку недели ќе ја претставиме новата методологија за проширување и ќе им отвориме перспектива за почеток на пристапните преговори на Северна Македонија и на Албанија“,
порача Фон дер Лајен.
Претседателката на Европската комисија смета дека е добро што токму Хрватска во овој период претседава со Советот на ЕУ бидејќи таа ги знае проблемите во регионот, но е свесна и за силата на европската перспектива и колку таа може да влијае позитивно врз трансформацијата на земјата и на економијата.