Откако косовскиот премиер попладнево во Чаир присуствуваше на свечен настан по повод преименување на улицата „Втора македонска бригада“ во „Адем Демачи“, тој се упати кон Тетово, каде што беше пречекан од градоначалникот на градот и лидер на партијата БЕСА, Билал Касами
Во Тетово, како и во скопски Чаир, покрај Касами присуствуваа и претседателот на Демократско движење – Изет Меџити и лидерот на Алтернатива, Африм Гаши. Од Тетово, Касами и Курти порачаа дека Владата на С Македонија треба да се заземе поконкретно за проектот за поврзување на Тетово со Призрен со регионален пат, бидејќи постои физибилити студија со која овој проект може да стане реалност, и кажа дека локалната власт е спремна да помогне.
„Ние како локална власт нема да седиме со скрстени раце, ќе ја завршиме нашата работа и ќе придонесеме за развој на овој планински дел од Шара и негов развој и оваа делница да стане важен дел во поврзувањето меѓу Косово и С Македонија, односно Тетово и Призрен“,
рече Касами.
Курти даде поддршка за забрзување на работите за овој проект велејќи дека оваа делница е договор помеѓу двете влади, кој е потпишан од негова страна и од македонскиот премиер Ковачевски.
„Посакуваме оваа физибилити студија да се збогати поскоро со работа и реализација на овој регионален проект кој ќе помогне за развојот на двете земји“,
изјави Курти.
Она што беше воочливо и во Скопје и во Тетово е тоа што не беше забележано присуство на претставници од владејачките албански партии – ДУИ и Алијанса за Албанците.