И мајката и детето, од кое е земен брис и се чекаат резултати, се во добра здравствена состојба и се пуштени дома
Пациентка позитивна на коронавирусот се породила пред два дена на Клиниката за гинекологија и акушерство во Скопје. Денеска резултатите од тестот покажале дека родилката е позитивна на ковид-19.
Како што соопштија од Клиниката за гинекологија и акушерство, пациентката, и за време на приемот и за време на престојот, била без симптоми на болеста, но со оглед на тоа што доаѓала од кумановскиот регион била примена и породена во делот за изолација. И мајката и детето се во добра здравствена состојба и се испишани од болницата. Земен е брис и од бебето и се чекаат резултати.
„На Клиниката за гинекологија и акушерство – Скопје на 14 април во 20 часот е породена пациентка за која денеска резулатот од тестот за ковид-19 покажа дека е позитивна. Пациентката е породена спонтано, но затоа што е од кумановскиот регион, со неа уште од самиот прием на клиниката се постапуваше како со пациентка од ризично подрачје и по сите протоколи и беше земен брис за ковид-19. Затоа што доаѓа од кризен регион, пациентката беше примена и породена во делот за изолација, кој е наменет за суспектни и заразени пациентки од ковид – 19“,
информираат од Клиниката за гинекологија и акушерство во Скопје.