Таткото физички ја оттурнал наставничката и директно нападнал еден од учениците, соученик на нивното дете, заканувајќи му се дека ќе го убие. Го фатил детето за уво, го стапнал на ногата и го тегнел, а за тоа време неговата сопруга ја држела наставничката за да не може да му помогне и да го одбрани ученикот
Куќен притвор е одреден за маж од Битола кој пред два дена заедно со неговата сопруга влегле во битолско основно училиште и извршиле грубо насилство врз 15-годишен ученик.
Во образложението од Основното јавно обвинителство (ОЈО) Битола се вели дека мажот и жената на 15 мај влегле во основно училиште во Битола и извршиле насилство врз ученик, роден 2009 година, и му се заканувале дека ќе го убијат.
„Таткото физички ја оттурнал наставничката и директно нападнал еден од учениците, соученик на нивното дете, заканувајќи му се дека ќе го убие. Го фатил детето за уво, го стапнал на ногата и го тегнел, а за тоа време неговата сопруга ја држела наставничката за да не може да му помогне и да го одбрани ученикот“,
се вели во соопштението од Обвинителството.
Со насилството, додаваат од ОЈО, двајцата предизвикале чувство на несигурност и вознемиреност кај другите ученици, кои од страв кога заминале осомничените барале наставничката да ги заклучи во училницата за да не се вратат.
Надлежниот јавен обвинител до судијата на претходна постапка доставил предлог за определување куќен притвор за осомничениот татко, кој е прифатен и на осомничениот му е определена притворска мерка.
Сопружниците се осомничени дека во група извршиле грубо насилство врз дете, со што сториле кривично дело – насилство согласно член 386 став 2 во врска со став 1 од Кривичниот законик.