Членството во НАТО, вели европратеникот, е голем успех, како за ЕУ така и за Бугарија и земјава, но, како што додава, понатаму доаѓа поголемото прашање како земјата целосно ќе ја реализира својата надворешнополитичка аспирација, а таа поминува низ членството во ЕУ
Во исто време Ќучук смета дека треба да се обрне внимание и на добрите примери во односите меѓу Бугарија и С Македонија, но додава дека патот подобрување на односите мора да се оди пеш
Во С Македонија има политички сили кои јасно стојат зад агендата на земјата да биде дел од Европската Унија, но има и други кои ја влечат земјата кон други унии или барем ја пренасочуваат земјата од патот кон ЕУ, вели лидерот на европските либерали (АЛДЕ), европратеник од Обнови ја Европа/ДПС и известувач за земјава во ЕП, Илхан Ќучук, во интервју за бугарската новинска агенција БГНЕС.
Ќучук во интервјуто вели дека С Македонија несомнено чекори по тежок пат на консолидација околу важни теми поврзани со иднината на државата. Членството во НАТО, вели европратеникот, е голем успех, како за ЕУ така и за Бугарија и земјава, но како што додава, понатаму доаѓа поголемото прашање како земјата целосно ќе ја реализира својата надворешнополитичка аспирација, а таа поминува низ членството во ЕУ.
Тој предупредува дека во РСМ има сили кои ја влечат државата кон други геополитички проекти.
„Има политички сили кои јасно стојат зад агендата на земјата да биде дел од ЕУ, но има и други кои ја влечат земјата кон други унии или барем ја пренасочуваат земјата на патот кон ЕУ. И во самото македонско општество се водат овие разговори“,
вели известувачот за С Македонија во Европскиот парламент.
Според него, треба да се разговара за социјална и економска политика, но на тема иднината на државата, за членството во ЕУ, не може да има различни гледишта.
„Треба да има национален консензус не само меѓу поединечни политички субјекти, туку и меѓу луѓето што креираат мислења“,
рече европратеникот.
Во исто време Ќучук смета дека треба да се обрне внимание и на добрите примери во односите меѓу Бугарија и С Македонија, но, додава дека патот подобрување на односите мора да се оди пеш.
„Меѓу Бугарија и РСМ се случија многу добри работи поврзани со образованието – се збратимија универзитетите, се збратимија општините. Овој пат мора да се оди пеш. Да, разговорот е комплициран, заситен е со многу напнатост и многу емоции, но единствен начин е да разговараме меѓу себе, бидејќи ако светот е скршен, тој е скршен најмногу поради скршеноста на дијалогот. Ако го негираме дијалогот како начин да се надминат кризите и да се надминат слоевитите емоционални расположенија, нема пат напред. Бугарија и РСМ мора да најдат нови патишта по кои ќе одат двата народа“,
вели европратеникот и известувач за напредокот на земјава во ЕП, Илхан Ќучук.