Известувачот за Северна Македонија во Европскиот парламент, Илхан Ќучук, утрово го поздрави изборот на новата влада и нејзиното, како што рече, брзо формирање во услови на глобална пандемија, јави МИА од Брисел.
„Треба да потсетиме дека Заев ги истакна и договорите со Бугарија и со Грција како основа за продолжување на реформите. Новата влада во Скопје која е јасно проевропска, сега ги има сите алатки за да го продолжи напредокот што го направи Северна Македонија во последните години. Сметам дека една од првите задачи на новата влада е да изготви патоказ за пристапување, врз основа на широк консензус во земјата, а во меѓувреме Советот на ЕУ треба да го усвои финалниот текст од преговарачката рамка за да може да се свика првата меѓувладина конференција најбрзо што може“,
порача Илхан Ќучук во писмената реакција до медиумите.