Одлуката има за цел да го реши недостигот на основни продукти, како што се храна и лекови, бидејќи Куба се соочува со најголемата економска криза во последните децении, со зголемени цени и јавно незадоволство
Кубанската влада најави дека ќе дозволи странски инвестиции во трговијата на големо и мало за да се реши хроничниот недостиг на продукти во земјата. Овој потег претставува голема промена за комунистичката влада на островската држава, која ја менува политиката на Фидел Кастро од 1960-тите години за национализација на малопродажбата, објави Би-би-си.
Одлуката има за цел да го реши недостигот на основни продукти, како што се храна и лекови, бидејќи Куба се соочува со најголемата економска криза во последните децении, со зголемени цени и јавно незадоволство. Сепак, тоа не значи целосно отворање на кубанскиот пазар.
Владини претставници рекоа дека странски инвеститори ќе можат целосно или делумно да поседуваат продавници на Куба. Но трговијата, сепак, нема да биде отворена за меѓународни инвеститори без контроли, бидејќи „превласта мора да ја има државата“, рече министерката за надворешна трговија Бетси Дијаз Веласкез.
Министерот за економија Алехандро Гил рече дека овој потег ќе овозможи проширување и диверзификација на понудата за населението и ќе придонесе за закрепнување на домашната индустрија.
Во 1969 година Фидел Кастро ја национализира приватната кубанска индустрија на големо и мало. Новиот закон за странски инвестиции, сепак, признава дека владата не може да го реши недостигот на основни добра без странски инвестиции.
Владини претставници велат дека новата политика ќе им даде приоритет на бизнисите кои се во Куба веќе неколку години и работат со компании кои продаваат технологии и опрема за зелена енергија што, пак, би можеле да го поттикне домашното производство.
Некои од продавниците во земјата мораа да спроведат рационализирање за да им обезбедат на потрошувачите пристап до основни производи, како што е масло за јадење.
Илјадници луѓе го изразија своето незадоволство од високите цени и недостигот на храна и лекови на протести ширум земјата. Бидејќи неовластените јавни собири се нелегални на Куба, многу демонстранти беа уапсени.
Пандемијата на коронавирусот, намалените субвенции од Венецуела и строгите ограничувања и санкции наметнати на Куба од поранешниот американски претседател Доналд Трамп придонесоа за економските проблеми на земјата.
Во мај оваа година САД одлучија да ги ублажат санкциите кон Куба од ерата на Трамп. Според новите мерки, одобрени од администрацијата на претседателот Џо Бајден, ограничувањата за патување се олеснети, а износот на пари што жителите на САД можат да го испратат до своите семејства во Куба е зголемен.