Во соопштението на „Вреди“ се вели и дека овој случај е силна потврда дека долгогодишното владеење на партијата на Бектеши донело невиден притисок врз Албанците за да ја изразат својата слободна волја преку гласање
Откако МВР пред два дена поднесе кривична пријава за поранешниот министер за економија Крешник Бектеши поради постоење основи на сомнение за сторено кривично дело попречување на правдата, денеска преку соопштение се огласи коалицијата „Вреди“. Оттаму велат дека тие ја поздравуваат и ја поддржуваат секоја активност која има за цел да го зајакне на правото и редот во државата и дека токму кривичната пријава против Бектеши јасно и недвосмислено покажува дека партијата од која потекнува Бектеши била дел од октопод на криминал, корупција и крадење на гласовите.
„Овој случај е силна потврда дека долгогодишното владеење на партијата на Бектеши донело не само крадење од граѓаните, туку и невиден притисок врз Албанците за да ја изразат својата слободна волја преку гласање. Коалицијата ВЛЕН секогаш ќе се залага за владеењето на правото, а никогаш за политички реваншизам. Затоа, ги повикуваме правосудните органи преку правилна и правична постапка предметното лице да ја докаже својата невиност или да се докаже неговата вина во зависност од доказите“,
се вели во соопштението.
Поранешниот министер за економија вчера на социјалните мрежи ја објави пораката која ја испратил до началникот на СВР Охрид за која доби кривична пријава велејќи дека пријавата е одмазда за дебаклот што го добија (Коалицијата „Вреди“ н.з.) од граѓаните на изборите на 8 мај годинава.
„На 7 мај во својство на координатор на ’Европскиот фронт’ во ИЕ 5 добив информација од штабот на ’Европскиот фронт’ во Охрид дека на денот на изборниот молк бил проверен шефот на штабот и членовите на штабот од страна на СВР-Охрид, што е директна интервенција во изборниот процес од страна на СВР-Охрид. Имајќи предвид дека должноста на раководителот на секторот е да обезбеди фер и демократски избори, подолу е пораката што ја испратив како човек кој има одговорност и за изборниот процес. Но, тоа не е нивната цел (проценете сами од пораката подолу), нивната цел е одмазда за дебаклот што го добија од граѓаните на 8 мај“.
напиша Бектеши на Фејсбук.
Реакција имаше и од неговата партија ДУИ од каде што кривичната пријава ја нарекоа политички мотивиран лов на вештерки за нивна дискредитација
На ова следуваше одговор од владејачката ВМРО-ДПМНЕ од каде што побараа од обвинителството и судството да постапат по случајот со Крешник Бектеши и тој да сноси одговорност, притоа повикувајќи ја ДУИ да „не се фолира по медиумите“ и да се огради од Бектеши.
„Добро е што Бектеши призна дека правел притисок, а сега ЈО и судството да постапат и да сноси и одговорност. Како таа порака со содржина дека е срамота што МВР се занимава со млади луѓе не е притисок? Дали за Бектеши младите прекршители на законот или криминалци не се криминалци? Што за Бектеши се млади луѓе, дали тоа се лица од 18 до 30 години и дали тие не треба да се гонат ако направиле прекршок или кривично дело? Која порака Бектеши ја упатува до младите?“,
прашуваат од ВМРО-ДПМНЕ преку соопштение.
За потсетување, во полицискиот билтен за 25.7.2024 година, како што соопшти МВР, СВР Охрид му поднело кривична пријава на К.Б. (39) од Кичево поради постоење основи на сомнение за сторено кривично дело попречување на правдата. Како што објави Телма, станува збор за поранешниот министер од редовите на ДУИ, Крешник Бектеши, односно иницијалите објавени во билтенот соодветствуваат на неговото име.