Откако американскиот претседател Доналд Трамп минатата недела се закани дека ќе ги напушти напорите за постигнување мир, двете страни се под притисок да покажат напредок за завршување на војната во Украина, која влезе во својата четврта година
Русија е подготвена да го разгледа предлогот на украинскиот претседател Володимир Зеленски двете страни да престанат со нападите врз цивилната инфраструктура, соопшти денеска Кремљ. Според портпаролот на Кремљ, Дмитриј Песков, тоа е сложена тема за која претседателот Владимир Путин е подготвен да разговара. Но, тој исто така рече дека во моментов нема конкретни планови за разговори меѓу Русија и Украина.
Откако американскиот претседател Доналд Трамп минатата недела се закани дека ќе ги напушти напорите за постигнување мир, двете страни се под притисок да покажат напредок за завршување на војната во Украина, која влезе во својата четврта година.
Зеленски вчера изјави дека Украина е подготвена за секаков вид комуникација за да се спречат нападите врз цивилната инфраструктура.
„Подготвени сме за каков било разговор за да се постигне ова и очекуваме јасен одговор од Москва“,
рече Зеленски.
На прашањето како ќе одговори Кремљ, Песков рече дека за ова треба да се разговара земајќи го предвид искуството од 30-часовното велигденско примирје што Путин еднострано го прогласи.
Тој не даде дополнителни детали за својата изјава, но двете страни се обвинија меѓусебно за многубројни прекршувања на прекинот на огнот за време на велигденскиот викенд и за повторени прекршувања на мораториумот за напади врз енергетските постројки, постигнат минатиот месец, со посредство на САД.
Путин зборуваше за разликата помеѓу цивилни и воени цели
Песков вели дека Путин вчера ја истакнал сложеноста на ова прашање бидејќи е потребно да се направи разлика кога цивилна цел станува воена цел, а кога не.
„Цивилен објект станува цел ако таму има непријателски борци, па затоа тука има нијанси за кои има смисла да се дискутира“,
рече вчера Путин.
Цивили ги губат животите и во Украина и во Русија, но многу повеќе на украинска страна.
Русија во повеќе наврати досега изрази подготвеност да преговара со Украина, но Киев го направи тоа правно невозможно по декретот на Зеленски од 2022 година со кој преговорите со Путин се забранети, рече Песков.
Уредбата беше донесена откако Русија анектира четири украински региони.
„Доколку Украина сака да разговара, тогаш треба законски да ги отстрани пречките за тие контакти“,
додаде Песков.