Британскиот крал Чарлс Трети и кралицата Камила, придружувани од кралското семејство, денеска излегоа на балконот на Бакингемската палата за да ги поздрават десетиците илјади луѓе собрани по повод нивното крунисување.
Заедно со кралот и кралицата со круни и во церемонијална облека беа и престолонаследникот Вилијам со сопругата Кејт и нивните деца.
Крунисувањето на кралот беше означено со ставање на круната на свети Едвард на главата на Чарлс Трети.
Чинот се случи на средина од церемонијата што ја води надбискубот Џастин Белби.
Претходно Чарлс Трети положи заклетва во која кажа дека ќе го почитува законот и Англиската црква за време на своето владеење и потврди дека е верен протестант.
Откако во Вестминстерската опатија седеше на историскиот кралски престол, кралот доби кралски меч „за да ја заштити правдата, црквата и народот“, а доби и други кралски обележја како што се жезол, палка, златно јаболко, ракавица и прстен.
Плотуни беа испукани во моментот на крунисувањето на 11 локации низ Обединетото Кралство, вклучувајќи ги Единбург, Кардиф и Белфаст, како и од бродови на британската кралска морнарица.
Кралот беше крунисан пред повеќе од 2 300 гости, меѓу кои многубројни шефови на држави и членови на кралски семејства.
Впечатлив момент беше што по крунисувањето, престолонаследникот, неговиот син, принцот Вилијам, го бакна во образот. Вилијам со сопругата Кејт Мидлтон се во првиот ред на церемонијата. Присутен е и вториот син на кралот, принцот Хари, кој седи во задните редови со другите членови на поширокото кралско семејство. Хари допатува во Лондон без сопругата Меган Маркл и се очекува набрзо по церемонијата да се врати во САД каде што ќе го прослави роденденот на неговиот син Арчи.
Покрај него, за кралица беше крунисана и неговата сопруга Камила.
Двајцата во Вестминстерската опатија дојдоа од Бакингемската палата со кочија.