Овие пресметки ги земаат предвид и смртните случаи кои не биле поради директна последица на ковид туку биле предизвикани од неговите негативни ефекти, како кај луѓето кои не можат да пристапат до болниците за негата што им е потребна
Пандемијата на коронавирусот однесе речиси 15 милиони животи во светот, што е за 13 отсто повеќе од она што се очекуваше, соопшти Светската здравствена организација (СЗО).
СЗО смета дека многу земји ја потцениле битката со смртните случаи од ковид, имајќи предвид дека претходно биле пријавени само 5,4 милиони смртни случаи од коронавирусот.
Според проценките, во Индија имало 4,7 милиони смртни случаи од ковид, 10 пати повеќе од официјалните бројки.
Индиската влада ја доведе во прашање проценката, велејќи дека постои „загриженост“ во врска со методологијата, меѓутоа и други студии дојдоа до слични заклучоци за бројките на смртни случаи во земјата.
Мерката што ја користи СЗО се нарекува вишок на смртни случаи, односно колку луѓе починале повеќе отколку што инаку би се очекувало врз основа на смртноста во истата област пред да се појави пандемијата.
Иако повеќето се сметаат за директни смртни случаи од ковид-19, овие пресметки ги земаат предвид и смртните случаи кои не биле директна последица на ковид, туку биле предизвикани од неговите негативни ефекти, како што се луѓето кои не можат да пристапат до болниците за негата што им е потребна. Ова го објаснува и лошото водење на евиденција во некои региони и реткото тестирање на почетокот на кризата.
При објавувањето на резултатите од истражувањето, шефицата на одделот за податоци на СЗО, Самира Асма, рече дека тоа е трагедија.
„Тоа е неверојатна бројка и за нас е важно да им оддадеме почит на изгубените животи и треба да бараме одговорност од креаторите на политиката“,
рече таа.
Според податоците на СЗО, покрај Индија, земји со најголем број на смртни случаи се Русија, Индонезија, САД, Бразил, Мексико и Перу.
Извештајот, исто така, ги разгледува вишокот на смртност во однос на населението на секоја земја. Вишокот на смртност во Велика Британија – како и САД, Шпанија и Германија – бил над светскиот просек во 2020 и 2021 година.
Земји со ниска стапка на вишок на смртност се Кина, која продолжува да спроведува политика на „нулта толеранција“, Австралија, која воведе строги ограничувања за патувања за да го задржи вирусот надвор од земјата, како и Јапонија и Норвешка.
Photo: EPA-EFE/MAXIM SHIPENKOV