Од 34 илјади заразени со новиот коронавирус во Холандија, 124 се на возраст помала од 14 години, од кои 47 биле хоспитализирани
Основците во Холандија ќе се вратат во училишните клупи од 11 мај по неколкунеделната онлајн-настава поради коронавирусот, објави премиерот Марк Руте. Ова засега е единствената позначајна одлука за релаксирање на мерките што ги презема холандската влада за да го спречи ширењето на вирусот.
Средношколците би можело да се вратат во училиштата на 1 или 2 јуни, а масовните настани, вклучувајќи ги и натпреварите во професионалниот фудбал, остануваат забранети најмалку до 1 септември.
Одделенијата треба да се поделат на две
Според одлуката на владата во Хаг, основните училишта сами треба да го одредат распоредот и динамиката на наставата, притоа водејќи сметка за препораките поврзани со пандемијата. Во најголем број случаи тоа би значело одделенијата да се поделат во две групи, кои би следеле настава во различни термини – или преку еден ден или по половина од времето предвидено за еден училишен ден.
„Дистанца од 1,5 метри меѓу учениците е невозможно да се одржува. Но, сите податоци покажуваат дека за помалите деца е малку веројатно да се заразат, а и ризикот за оваа група е мал“,
рече Руте, додавајќи дека болните деца треба да останат дома.
Холандскиот премиер верува дека одлуката за отворање на основните училишта за две и пол недели отсега, ќе им го олесни животот на родителите.
Од 34 илјади инфицирани со новиот коронавирус во Холандија, 124 се на возраст помала од 14 години. Од нив, 47 биле хоспитализирани.