Премиерот во интервјуто за српскиот весник посочил дека речиси секојдневно контактира со претседателот на Србија и албанскиот премиер, а таквото пријателство со нив, според Ковачевски, не само што изненадило многумина туку, како што рече, верува оти ќе послужи како инспирација за градење добрососедски односи
Говорејќи за односите меѓу Скопје и Белград, но и за односите што Северна Македонија ги има со другите соседи, премиерот Димитар Ковачевски во интервју за српскиот весник „Политика“ вели дека редовно, речиси секојдневно контактира со претседателот на Србија, Александар Вучиќ, и албанскиот премиер Еди Рама, а на тој начин, како што рече, тие како лидери се справуваат со потребите на граѓаните во своите земји.
Ваквото пријателство, според Ковачевски, не само што изненадило многумина туку, како што рече, верува оти ќе послужи како инспирација за градење добрососедски односи.
„Обично географски малите земји даваат одличен пример на светот. Верувам дека и во сегашниот контекст на настаните сме светла точка за регионот, но и за Европа и светот“,
вели Ковачевски во интервјуто за „Политика“.
Вистинското пријателство, според премиерот, доаѓа до израз во тешките моменти, а како потврда за добро изградените односи меѓу Северна Македонија и Србија, Ковачевски ја посочи пандемијата на коронавирусот и светската економска и енергетска криза.
„Заемното почитување создава основа за натамошен развој на нашите добрососедски односи“,
додава премиерот.
Премиерот во интервјуто за српскиот весник, меѓу другото, истакнал дека иднината на Западен Балкан е во Европската Унија, а тоа, како што кажа, за земјите од регионот ќе значи подобрување на квалитетот на животот на граѓаните и обезбедување предвидливост во безбедноста и стабилноста.