Во врска со поскапувањата на дел од основните прехранбени производи, интервенциите, како што изјави денеска премиерот, ќе бидат најверојатно во делот на маржите и во делот на разликата меѓу производните и продажните цени
Проблем, како што најави тој, ќе има со млекото, бидејќи се јавува криза во снабдувањето на млечната индустрија во одредени региони во светот поради војната во Украина
Нови мерки на Владата сигурно ќе следуваат, изјави денеска премиерот Димитар Ковачевски, одговарајќи на новинарски прашања во врска со поскапувањата на дел од основните прехранбени производи.
За идните мерки што ќе се преземат, како што рече тој, веќе било разговарано со министрите од економските ресори во Владата.
Интервенциите, како што информира премиерот, најверојатно ќе бидат во делот на маржите и во делот на разликата меѓу производните и продажните цени.
„Ние ги следиме цените… Веќе со економските министри во Владата разговаравме во однос на идните мерки коишто ќе се преземат, пред сè во делот на маржите и пред сè во делот на разликата на цените од производителите до финалната цена на рафт и сигурно дека ќе следуваат нови мерки, бидејќи никој не може во време на криза да печали на грбот на граѓаните“,
рече Ковачевски, одговарајќи на новинарски прашања по отворањето на нов објект на детска градинка во Општина Карпош.
Проблем, како што најави тој, ќе има со млекото, бидејќи се јавува криза во снабдувањето на млечната индустрија во одредени региони во светот поради војната во Украина.
Во врска со ова прашање, премиерот рече дека веќе утре ќе има состанок со министерот за земјоделство, шумарство и водостопанство, Љупчо Николовски.
„Ќе има проблем кај млекото, бидејќи се јавува криза со снабдување со млеко и веќе утре имам состанок со министерот за земјоделство во однос на тоа кои мерки ќе ги преземеме бидејќи се јавува недостаток во одредени региони во светот на млеко, а тоа е секако резултат на војната којашто се води во Украина“,
рече Ковачевски.
Осврнувајќи се поопширно на ова прашање, премиерот даде осврт на влијанието на војната во Украина врз земјоделството и снабдувањето со храна во светски рамки.
„Украина е најголемата житница во Европа, заедно со Русија, а Русија, пак, е најголем, заедно со скандинавските земји, производител на вештачки ѓубрива и ако ги погледнете берзанските цени, ќе видите дека сè се тоа цени кои се драматично покачени во делот на вештачките ѓубрива. Само еден податок дека без доволно снабдување на вештачки ѓубрива приносите во земјоделието се намалуваат за 50 проценти. На другите препарите исто така им се зголемени цените бидејќи најголем дел од нив доаѓаат од производствени капацитети коишто користат нитрати, а нитратите се добиваат со помош на гас кој доаѓа од Русија. И сега поради прекинот и на Северен тек, меѓутоа и заради санкциите (кон Русија.н.з) кои се случуваат, има намалено производство на вештачки ѓубрива“,
рече Ковачевски.
Ситуацијата со вештачките ѓубрива лани, како што потсети премиерот, се решеваше со субвенции за земјоделците, а иста мерка се предвидува и за оваа година.
„Тој дел го помогнавме минатата година, бидејќи вештачките ѓубрива ги субвенциониравме за земјоделците, а истото ќе го направиме најверојатно и оваа година и со тоа да обезбедиме цени кои ќе бидат адекватни на нашиот пазар и на стандардот којшто го имаат нашите граѓани. Значи на тоа постојано се работи“,
вели премиерот Ковачевски.
Замрзнување на цените на основните прехранбени производи поради поскапувањето на продуктите вчера побараа од Организацијата на потрошувачи на Македонија (ОПМ).
Ваквата состојба, како што рече претседателката на ОПМ, Маријана Лончар-Велкова, одзема голем дел од буџетот на секое семејство и паѓа исклучиво на товар на граѓаните.
Според неа, Комисијата за заштита на конкуренција би требало да реагира за да види дали има некакво здружување на трговците по толкавото, како што истакна, „плафонирање“ на цените од нивна страна.
„Знаеме дека замрзнувањето на цените е популистичка мерка и дека имаме пазарна економија, но во вакви ситуации не треба да се чека, треба да се излезе со точна проценка и да се преземат мерки зашто се оди на товар и на штета на потрошувачот. За основните намирници мислам дека не треба ни да се зборува“,
изјави Маријана Лончар-Велкова на вчерашната прес-конференција.
Бизнис-заедницата, пак, е против замрзнување на цените бидејќи смета дека има други мерки со кои државата би можела да интервенира за да го ублажи ценовниот шок. Во овој контекст предлага намалување на даноците или активирање на стоковните резерви.
И министерот за економија Крешник Бектеши смета дека има други механизми, како што е утврдувањето маржи за одредени производи. Според него, во услови на неосновано неконтролирани зголемувања на цените, можеби е најдобро да се оди и поригорозно, дури и со забрана за вршење дејност на некои трговци. Но, сепак, какви мерки ќе се преземат, ќе зависи од анализите на надлежните институции.