Случајно или не, посетата на помошникот-генерален секретар на НАТО за разузнавање и безбедност на земјава доаѓа по скандалот со додавањето на македонско државјанство на контроверзниот украинец, Олександр Онишченко, за што позитивно мислење, меѓу останатите институции дала и Агенцијата за национална безбедност, без да биде направена консултација со партнерите од НАТО
На состанокот, според владиното соопштение, пред сè било разговарано за воената агресија на Русија кон Украина и понатамошното влијание на овие случувања врз глобалната енергетска состојба и врз прехранбената индустрија
Премиерот, Димитар Ковачевски денеска имал средба со помошникот-генерален секретар на НАТО за разузнавање и безбедност, Дејвид Катлер, на која, како што се наведува во соопштението од Владата, двајцата изразиле „взаемна благодарност за соработката на Северна Македонија со НАТО особено во делот на добивање навремени информации и соработката со македонските безбедносни служби“.
На состанокот, според владиното соопштение пред сè било разговарано за воената агресија на Русија кон Украина и понатамошното влијание на овие случувања врз глобалната енергетска состојба и врз прехранбената индустрија.
„Премиерот Ковачевски на средбата ја истакна цврстата поддршка за територијалниот интегритет и суверенитет на Украина во нејзините меѓународно признати граници и посочи дека Северна Македонија ќе ја продолжи политичката и практичната поддршка со цел да и се помогне на Украина да се одбрани и да ги оствари своите суверени права. Оваа позиција беше поздравена од помошникот-генерален секретар на НАТО за разузнавање и безбедност, Дејвид Катлер како исклучително важна за Алијансата“,
се наведува во соопштението.
Ковачевски и помошникот-генерален секретар на НАТО за разузнавање на состанокот разговарале за безбедносната, политичката, економската и енергетската состојба во државата во контекст на војната во Украина, а на состанокот било посочено дека соработката меѓу земјите-членки на НАТО е од исклучителна важност за безбедноста, како на Алијансата, така и на регионот и на Северна Македонија како НАТО – членка.
„Премиерот Ковачевски и помошникот-генерален секретар Катлер, на средбата разговараа за справувањето со хибридните закани, што е еден од главните приоритети на НАТО, посочувајќи дека Алијансата мора ефикасно да се бори против ваквите закани. На состанокот премиерот Ковачевски и помошникот-генерален секретар Катлер изразија взаемна благодарност за соработката на Северна Македонија со НАТО особено во делот на добивање навремени информации и соработката со македонските безбедносни служби“,
стои во соопштението од Владата за средбата.
Случајно или не, посетата на заменикот-генерален секретар на НАТО за разузнавање и безбедност на земјава доаѓа по скандалот со додавањето на македонско државјанство на контроверзниот украинец, Олександр Онишченко, за што позитивно мислење, меѓу останатите институции дала и Агенцијата за национална безбедност, без да биде направена консултација со партнерите од НАТО.
Според најавите, директорот на Агенцијата, Виктор Димовски денеска требаше на затворена седница на Владата да реферира за случајот со Онишченко, но засега нема информации дали седницата се одржала.
Димовски за случајот веќе се произнесе пред собраниската Комисија за надзор над работата на Агенцијата за национална безбедност и на Агенцијата за разузнавање.
По седницата во петокот, минатата недела Димовски изјави дека при интерната постапка во АНБ за евентуален пропуст за случајот „Онишенко“ е констатирано дека не е испочитувано последното ниво од безбедносната проверка и не била направена консултација со партнерите од НАТО пред да се даде позитивно мислење. Според него, „лоциран е прстенот и поединецот“ што го ставил потписот и ќе се преземе одговорност. Димовски додаде дека чекањето за реферирање за случајот, било поради тоа што требало да се почитуваат и следат институционалните норми и да се истражи ако затаил, каде и зошто затаил системот за национална безбедност.
Дел од оваа затворена седница на Комисијата се пренесуваше во живо на јутјуб-каналот на Собранието, поради што беше прекината и за што се истражува како и зошто се случило тоа.
Инцидентот околу безбедносниот пропуст на јутјуб-каналот на Собранието го истражува Секторот за компјутерски криминал при Министерството за внатрешни работи.