СДСМ на 23 март, в сабота, ќе одржи Конгрес на кој ќе ја претстави програмата и партиските листи кои ќе учествуваат на претстојните парламентарни избори
Лидерот на СДСМ, Димитар Ковачевски, сè уште не ги открива имињата на носителите на листи за парламентарните избори. Тој денеска, одговарајќи на новинарски прашања, само потврди дека директорката на Управата за јавни приходи (УЈП), Сања Лукаревска, ќе биде носителка на листа во една од изборните единици, но не кажа во која. Во врска со информациите во некои од медиумите, дека наводно Лукаревска ќе биде преместена во третата изборна единица, а во втората ќе се врати поранешниот министер за внатрешни работи Оливер Спасовски, Ковачевски нагласи дека никој никаде не е преместен.
„Никој никаде не е преместен. Сите наши видни членови вршат функции кои имаат државно значење. Лукаревска е заменик-претседател на партијата и директор на УЈП, исклучително чесно и одговорно ја извршуваше својата работа во текот на мандатот и тоа многу јасно се гледа од анкетите и таа сигурно ќе биде носител на листа во една од изборните единици, но во која, тоа ќе оставиме да одлучат раководството на партијата, Централниот и Извршниот одбор, а на крајот, секако, и Конгресот. Состаноците ќе бидат во сабота, прво ќе се одржи состанок на ИО, потоа седница на ЦО, а во попладневните часови ќе почне и Конгресот. Ова е статутарна процедура, не е првпат, туку вака се одвива изборот на кандидати за пратеници и носители на пратенички листи од првите избори. Убеден сум дека делегатите на Конгресот ќе ги изберат најдобрите кандидати кои на достоен начин ќе го претставуваат и СДСМ и нашата проевропска коалиција“,
истакна Ковачевски одговарајќи на новинарски прашања откако засади дрвце во Капиштец, во рамки на акцијата на Општина Центар по повод Денот на пролетта.
Тој не сакаше да одговори на прашањето кои се неговите предлози за носители на листи.
„Ова е прашање кое нема да ви го одговорам зашто и кога се работеше за претседателски кандидат на државата, се држев до етичкиот аспект и до статутарните одредби на СДСМ, бидејќи финалниот збор го даваат органите на партијата, а не само еден човек. Како што беше со претседателскиот кандидат Пендаровски, кој едногласно беше утврден со гласање на конгресот, исто ќе биде и за носителите и на кандидатите за пратенички листи“,
рече лидерот на СДСМ.
Во врска со анкетата на МРТ, според која ВМРО-ДПМНЕ има многу поголемо водство на СДСМ, Ковачевски оцени дека таа се прави од институт близок до ВМРО-ДПМНЕ.
„Тоа што се случува таму наликува точно на она што се случуваше до 2016 година. За тие анкети ќе ви кажам дека на исти луѓе им се јавуваат и на мобилен и на фиксен телефон, и така ги добиваат резултатите. За тоа дека се работи за лажни анкети најдобро потврдува денот на собирањето на потписите за претседателски кандидати, кога ВМРО-ДПМНЕ и таму очекуваше да има пет пати повеќе потписи, за на крај ние да собереме над 22 000 потписи. Тие објавија дека собрале повеќе, но на крај, се испостави дека нивниот претседателски кандидат ќе биде кандидиран само со потписи на пратениците што очигледно потврдува дека и тие потписи не биле толку колку што биле објавени или имало некој друг инженеринг околу нивното собирање“,
рече Ковачевски.
СДСМ на 23 март, в сабота, ќе одржи Конгрес на кој ќе ја претстави програмата и партиските листи кои ќе учествуваат на претстојните парламентарни избори.