Изјавата на премиерот следува откако викендов во скопски Илинден загина 14-годишно девојче, кое, според наводите на Обвинителството, се качило на вагон-цистерна и допрело жица за струја со висок напон, при што дошло до струен удар. Засега не се знае точната причина зошто девојчето се качило на вагонот, но според неофицијални информации 14-годишничката сакала да сними видео за социјалните мрежи качена на вагонот
По трагичниот настан во кој загина 14-годишно девојче качено на вагон, за кое се претпоставува оти се качило на вагонот сакајќи да сними видео за социјалната мрежа Тик-ток, премиерот Димитар Ковачевски најави дека во иднина државата ќе размисли во делот на користењето на дел од социјалните медиуми.
„Не зборувам за сите, не зборувам за некои априори ограничувања, туку напротив, зборувам за регулирање кое ќе овозможи нивна употреба со цел унапредување на општеството, а не да бидат користени за нешто што не сакаме да го имаме како последица во општеството“,
рече Ковачевски во одговор на новинарско прашање по доделувањето социјални станови во Гостивар.
Прашан дали земјава планира да преземе некаков чекор по пример на други земји кои почнаа да ја блокираат оваа социјална мрежа, Ковачевски, не прецизирајќи, кажа дека согласно стратегијата за дигитализација и за медиуми, во иднина ќе се размислува и за ова прашање.
„Социјалните медиуми се нов феномен во општеството. Во моментот кога настанаа пред скоро над 10 години беа апсолутно интересни за сите, меѓутоа уште тогаш експерти зборуваа дека ќе дојде момент да социјалните мрежи на начинот на кој се креирани дека ќе бидат тешки за контрола, практично невозможни и дека ќе дојде момент кога ќе треба да се направи регулирање на целокупното нивно функционирање“,
додаде премиерот.
Викендов во скопски Илинден загина 14-годишно девојче, кое, според наводите на Обвинителството, се качило на вагон-цистерна и допрело жица за струја со висок напон, при што дошло до струен удар.
Засега нема официјални информации зошто девојчето, кое на местото на настанот било придружувано со уште две малолетни лица, решило да се качи на еден од вагоните. Според неофицијални информации објавени од дел од медиумите, една од причините може да било за да се направат фотографии или видеа за социјалните мрежи.