Изјавата на Ковачевски следува откако дел од медиумите објавија оти последниве неколку денови премиерот Ковачевски и лидерот на Алијанса за Албанција, Арбен Таравари воделе преговори за влез на Алијанса во Владата, на местото на Алтернатива
Премиерот Димитар Ковачевски вели дека немал разговори за можна реконструкција на Владата, а како што рече, Владата во моментов функционира со стабилно мнозинство од 64 пратеници, а тоа се потврдило со изборот на новиот министер за локална самоуправа Ристо Пенов.
Изјавата на Ковачевски следува откако дел од медиумите објавија оти последниве неколку денови премиерот Ковачевски и лидерот на Алијанса за Албанција, Арбен Таравари воделе преговори за влез на Алијанса во Владата, на местото на Алтернатива. Тоа, според неофицијални информации на „Прес 24“, би било прифатливо за владината коалиција на СДСМ и ДУИ, оти Алтернатива има три, а Алијанса осум пратеници во парламентот.
Одговарајќи на новнарско прашање како ги коментира овие објави во медиумите за можна смена на министрите на Алтернатива со министри од Алијанса за Албанците, Ковачевски рече дека не ги видел написите за кои е прашан, а дека тоа што се пишува во медиумуте во овој момент се шпекулации.
„Јас не сум имал разговори како премиер, бидејќи премиерот предлага министри во владата во однос на реконструкција во владата така што сетоа она кое се пишува е во рамките на шпекулации во овој момент“,
рече Ковачевски.
Вчера, на прес-конференција, премиерот нагласи дека во моментов не се разговара за влез на опозициската Алијанса на Албанците во Владата, но кажа дека го радува што владините ставови што се однесуваат на иднината на државата имаат поддршка од оваа партија.
Премиерот во понеделникот одржа средба со претседателите на парламентарните партии во Собранието, а по неа во изјава за медиумите неговиот коалициски партнер Павле Трајанов од Демократскиот сојуз (ДС) рече дека партија со осум пратеници, колку што има и Алијанса за Албанците чека да влезе во Владата.
В.д. претседателот на Алијанса, Арбен Таравари, пак, по ваквата изјава не сакаше да коментира за евентуален влез во Владата.