„Гледајте, едниот веќе не е директор (Каевски н.з.), вториот (Мојсовски н.з.) после 8 мај секако нема да биде директор, било дали сум јас премиер или не, со оглед на тоа дека сигурно доколку граѓаните се определат да дадат доверба на Социјалдемократскиот сојуз на Македонија и на ‘Коалицијата за европска иднина’ да формира влада, тогаш ќе имаме многу нови кадри коишто ќе управуваат со институциите“, изјави денеска лидерот на СДСМ прашан за коментар во врска со обвинението за распределбата на т.н. спортски ваучери
Обвинителството треба да работи согласно закон и независно за да може секој поединец во државата да има фер процес во кој ќе може врз основа на факти да го докаже она што се случило.
Ова денеска го изјави лидерот на СДСМ, Димитар Ковачевски прашан за коментар во врска со поднесениот обвинителен предлог против 12 лица кои се сомничат за злоупотреби со распределбата на т.н. спортски ваучери, а со кој се опфатени и актуелниот поранешниот директор на Агенцијата за млади и спорт (АМС), Наумче Мојсовски, односно Дарко Каевски, и двајцата членови и кадри на Социјалдемократскиот сојуз.
Тој рече оти нема што повеќе да додаде затоа што партија не води судски случаи, туку тоа е во надлежност на Обвинителството.
Прашан дали во меѓувреме ќе бара одговорност од Мојсовски и Каевски во рамките на партијата, лидерот на СДСМ одговори:
„Гледајте, едниот веќе не е директор (Каевски), вториот (Мојсовски) после 8 мај секако нема да биде директор било дали сум јас премиер или не, со оглед на тоа дека сигурно доколку граѓаните се определат да дадат доверба на Социјалдемократскиот сојуз на Македонија и на ‘Коалицијата за европска иднина’ да формира влада, тогаш ќе имаме многу нови кадри коишто ќе управуваат со институциите“,
рече Ковачевски одговарајќи на новинарски прашања по денешната средба со раководството на Стопанската комора на северозападна Македонија.
За потсетување, Јавното обвинителство на Република Северна Македонија во вторникот информира дека е поднесен обвинителен предлог против 12 лица поради злоупотреба на службената положба и овластување.
Обвинителниот предлог, како што информираа од Обвинителството, е поднесен по иницијатива на Државната комисија за спречување на корупацијата (ДКСК), чиј претходен состав во февруари лани соопшти дека постојат соменвања оти директорот на Агенцијата и членовите на Централната комисија во 2020, 2021 и 2022 година, по пат на искористување на службената положба и несовесно работење, заобиколувајќи ги законските процедури, извршиле распределба на средства, со што го оштетиле буџетот на државата, но и лицата што имале законско право на вакви средства, а не им биле доделени.
„Не почитувајќи ги критериумите за доделување средства по ваучер-системот, постојат сомнежи дека Централната комисија во континуитет од 2020 година досега врши незаконска распределба, односно доделување ваучери на повластени корисници, федерации и клубови, согласно интересот на поединци и групи, можеби и политички партии и ги ставиле во неповолна положба оние спортски субјекти кои не добиле соодветни средства, иако тоа право законски им припаѓало“,
рекоа тогаш од Антикорупциска.
Покрај актуелниот директор на АМС, Наумче Мојсовски, и ексдиректорот на Агенцијата, Каевски, меѓу осомничените е и актуелниот претседател на Македонскиот олимпски комитет (МОК), Даниел Димевски, како поранешен член на Центтралната комисија за АМС за доделување на ваучерите.
Тројцата преку објави на социјалните мрежи и изјави во медиумите ги отфрлија обвинувањата, оценувајќи ги како тенденциозни и најавија дека својата невиност ќе ја докажат во судската постапка.
Портпаролот на ВМРО-ДПМНЕ, Наум Столиковски денеска на прес-конференција рече дека предметот на Јавното обвинителство за работата на Дарко Каевски како директор на Агенцијата за млади и спорт (АМС) можеби ќе даде одговор на прашањето како тој со првото вработување како партиски подмладок за директор на АМС, на 30 години „набилдал“ четири милиони во банка и сопствен стан.
„Ликови како Дарко Каевски стануваат милионери, а неговите врсници се иселуваат од татковината. Со вашиот глас за ВМРО-ДПМНЕ на изборите ќе гласате ваквите ликови како Зоран Заев, Ковачевски, Венко Филипче и нивните наследници како Дарко Каевски, да им биде испитан имотот и да одговараат за евентуални злоупотреби“,
изјави Стоилковски.
На неговите изјави преку писмено соопштение веднаш реагираа од СДСМ, од каде што прашаа: „Дали Белата палата (седиштето на ВМРО-ДПМНЕ) води истраги, вклучително и споменатата?“
„СДСМ нема да навлегува во мотивите на ОЈО, секако дека секој што го прекршил законот треба да одговара, но, доколку се утврди дека нема прекршување на законот очекуваме исто така одговорност“,
велат од „Бихаќка“.
Оттаму додадоа дека постои сомнеж дека случајот со поднесувањето на обвинителниот предлог можеби е и злоупотреба на изборната кампања.
„Вештачењето е од 25.04.2024 година, само еден ден после првиот круг од претседателските избори, а предлогот е доставен за 3 работни дена потоа. Дали ОЈО се злоупотребува за изборната кампања исто како и хајката против Каевски, набргу ќе стане јасно“,
велат од СДСМ.