Во таа работна група, како што рече Ковачевски, во законот прво ќе бидат усогласени финално препораките на ОБСЕ/ОДИХР и исто така може да се разговара за точниот тајминг на изборите
Премиерот Димитар Ковачевски ја повика ВМРО-ДПМНЕ да делегира свој претставник во работната група за Изборниот законик која функционира во Министерството за правда и на која се разговара за сите прашања поврзани со изборите.
Ковачевски вели дека подготовката на изборите, Изборниот законик и нивното одржување се теми на кои се разговара во работната група во Министерството за правда и каде сите политички партии имаат делегирано свои претставници, така како што е според закон и според процедура.
„Единствено ВМРО-ДПМНЕ нема делегирано свој претставник. Ги поттикнувам да делегираат свој претставник бидејќи не може една или две партии да одлучуваат за процес во кој учествуваат 30 и повеќе политички партии. Местото за такво нешто е во работна група која како и секогаш тоа го прави“,
рече Ковачевски во одговор на новинарско прашање при неговата денешна посета на Дојран по почетокот на санацијата и реконструкцијата на колекторскиот систем и изградба на нова пречистителна станица.
Во таа работна група, како што рече Ковачевски, прво ќе бидат усогласени финално препораките на ОБСЕ/ОДИХР во законот и исто така може да се разговара за точниот тајминг на изборите бидејќи тие, додаде Ковачевски, се распишуваат согласно закон, Устав и согласно мандат на избраните и именуваните функционери. Тука пред сè мислам на претседателот на државата и на пратениците и нормално дека во рамките на законските рокови може да се разговара околу финеси за тајмингот, додаде тој.
Сè друго, вели Ковачевски, како одржување на средби кои се надвор од форматот каде што сите треба да го дадат својот збор и своето мислење мислам дека е вонинституционално.
„Ние такви работи сме гледале во минатото, за време на 11 години владеење на ВМРО-ДПМНЕ кога тогашниот претседател на Влада од аеродром кажуваше кога ќе има избори, па потоа се водеа секогаш тешки преговори кои државата не ја однесоа никаде напред туку стоеше во место и на крајот заврши со голема политичка криза која ја надминавме во 2017 година и денес изградивме демократско општество каде сите процеси се водат во институциите според закони и според она што е пропишано во државата“,
рече Ковачевски.
Премиерот потврди дека во текот на вчерашниот ден, додека бил во Собрание каде имаше пратенички прашања, имал одвоени средби со четворица претседатели на политички партии со кои е во коалиција.
„Едната од тие средби беше со претседателот на ДУИ, Али Ахмети. На тие средби разговаравме за сите актуелни прашања во државата вклучително и за изборите“,
рече Ковачевски.
Претседателот на собранието Талат Џафери на вчерашниот брифинг со новинарите рече дека до Нова година партиите треба да се договорат и да постигнат консензус за датумот на претседателските избори со цел да се запазат уставните рокови. Џафери рече дека парламентарните избори се друга приказна и за нив има други рокови. Што се однесува до формирањето работни групи за изборите, Џафери посочи дека им кажал на координаторите на пратеничките групи да размислат за изборниот процес и за сите обврски кои произлегуваат од него.
Претседателските избори, како што кажа Џафери, не можат да бидат предвремени и тие треба да се одржат во рок од 60 дена пред истекот на мандатот на актуелниот претседател, односно новоизбраниот претседател мора да биде инаугуриран на 12 мај. Согласно таа рамка од 60 дена, според Џафери, претседателските избори треба да се одржат, првиот круг најрано на 14 март и вториот круг најдоцна на 12 мај.
Што се однесува до парламентарните избори, според уставниот рок од 90 дена, тие би можеле да се распишат најрано на 5 мај 2024 година, објасни спикерот. Сè што е пред 5 мај, се предвремени избори и тогаш важат други рокови. Во врска со парламентарните избори, треба да се има предвид и рокот за формирање техничка влада, 100 дена пред нивното распишување.
Премиерот Ковачевски, вчера од собраниската говорница рече дека избори во земјава распишува претседателот на Собранието според рокови определени со закон и мандат на избраните функционери.
Вчера и лидерот на ВМРО-ДПМНЕ, Христијан Мицкоски повторно го повика премиерот Димитар Ковачевски да излезе со конкретен датум за претстојните претседателски и парламентарни избори додавајќи оти неговата партија нема да ги иницира состаноците на работната група која треба да ги договори официјалните датуми за изборите бидејќи, како што вели, тогаш ВМРО-ДПМНЕ ќе биде нападната зошто таа е иницијатор на состаноците, а не претседателот на Собранието, Талат Џафери.