Украинскиот државјанин Онишченко, кој се наоѓа на „црната листа“ на САД поради неговите врски со руските власти, добил македонско државјанство како спортист на предлог на Коњичката федерација. Одлука за доделување македонско државјанство за него донела Владата, по добиено позитивно мислење од сите надлежни институции
Директорот на Агенцијата за национална безбедност Виктор Димовски денеска на затворена седница на Влада ќе реферира за случајот „Онишченко“, информира премиерот Димитар Ковачевски.
Тој посочи дека Димовски ќе информира за сите детали како му е издадено државјанството на Украинецот Олександер Онишченко, односно како се обезбедени позитивните мислења.
„Понатаму од тоа не можам да коментирам, со оглед на тоа дека од затворени седници на Влада не може да се даваат информации бидејќи тоа е тешко казниво дело“,
изјави Ковачевски одговарајќи на новинарски прашања по потпишувањето на договорот за нова инвестиција на германската компанија „Киел“ во ТИРЗ Тетово.
Ковачевски, исто така, не одговори и дали средбата со помошник генералниот секретар на НАТО за безбедност и контраразузнавање била за случајот „Онишченко“.
„Не можам да кажам детали за разговорот со помошникот генерален секретар на НАТО за безбедност“,
изјави кусо Ковачевски.
Украинскиот државјанин Онишченко, кој се наоѓа на „црната листа“ на САД поради неговите врски со руските власти, добил македонско државјанство како спортист на предлог на Коњичката федерација. Одлука за доделување македонско државјанство за него донела Владата, по добиено позитивно мислење од сите надлежни институции.
Првиот човек на АНБ Виктор Димовски, информираше дека пропустот во случајот со Онишченко е направен на последното ниво, кое требало да направи меѓународна консултација со партнерите во рамките на НАТО, направило одобрение, меѓутоа потпишало дека не постои ризик без да го направи последниот чекор – потребната консултација со НАТО-партнерите.
Димовски кажа дека не смета оти има лична одговорност за случајот, но ако се утврди дека има пропуст од негова страна, тогаш тој ќе биде спремен да се соочи и да сноси одговорност ако се утврди дека е виновен.