„Заеднички е констатирано дека е неопходно Руската Федерација веднаш да ги повлече трупите од окупираните територии во Украина и да отпочнат мировни разговори“, стои во соопштението за средбата
Северна Македонија најостро ја осудува руската агресија врз украинските граѓани и дава целосна поддршка на суверенитетот и територијалниот интегритет на Украина, истакнал премиерот Димитар Ковачевски на денешната средба со новоименуваната украинска амбасадорка во земјава, Лариса Ди.
На состанокот, како што информираат од кабинетот на Ковачевски, била изразена благодарност за навремените и конзистентни политики на С Македонија во однос на ситуацијата во Украина, кои се на линија на надворешната политика на ЕУ, како и за донациите и помошта за украинскиот народ.
Премиерот изразил поддршка и за интеграциските аспирации на Украина, како демократска земја која припаѓа во демократските сојузи на држави.
„Заеднички е констатирано дека е неопходно Руската Федерација веднаш да ги повлече трупите од окупираните територии во Украина и да отпочнат мировни разговори“,
стои во соопштението за средбата.
На неа било разговарано и за последиците од војната во Украина, кои предизвикуваат криза во снабдувањето со енергија и храна во целиот свет, како и за можностите за нивно надминување.
„Претседателот на Владата Ковачевски најави дека Република Северна Македонија, како држава членка во НАТО и земја којашто ги почна преговорите со ЕУ, продолжува со принципиелните политики за одбрана на мирот, поставена целосно на линија на таквите надворешни политики на НАТО и на Европската Унија“,
велат од Владата.
На средбата, се додава, биле потврдени пријателските билатерални односи помеѓу двете држави и определбата за унапредување на економската соработката, во областа на енергетиката, инфраструктурата и туризмот.
Рускиот претседател, Владимир Путин во петокот, минатата недела ги потпиша документите за соединување на самопрогласените народни републики Донецк, Луганск и Херсонската и Запорошката Област со Русија, што предизвика жестоки реакции од западните земји и меѓународни институции.
Тие го осудија анектирањето на украинските територии, како и референдумите што под директива на Москва претходно се одржаа во нив и одлучно истакна дека никогаш нема да го признаат присоединувањето на овие територии кон Русија, кои, како што истакнаа се и секогаш ќе останат украински.