За разлика од тврдењата на Мицкоски дека вистинските преговори ќе почнат со втората меѓувладина конференција односно по вметнувањето на Бугарите во Уставот, СДСМ тврди дека тие започнуваат утре, од кога ќе стартува и скринингот
Сите лаги на Христијан Мицкоски, ВМРО-ДПМНЕ и Левица потонаа во вода! Вчера и јавно се објави Протоколот и сега е јасно како бел ден, сè што кажаа излажаа, рече денеска на прес-конференција пратеникот од СДСМ, Ненад Коциќ.
Според него, со протоколот кој беше објавен се докажа она што постојано го тврделе од власта – македонскиот јазик во ЕУ влегува со чиста формулација, без фусноти без никакви придавки и дополнителни објаснувања.
На прашање за најавениот референдум од страна на Мицкоски, Коциќ возврати со прашање: Дали на ВМРО-ДПМНЕ ѝ сметаат заклучоците од Собрание со кои владата се обврзува да не преговара за јазикот, идентитетот и историјата.
„Повеќе од две недели ги лажеа граѓаните, ги хушкаа и предизвикуваа да прават тензии и немири со цел да нема почеток на преговори со ЕУ со единствена цел борба за власт, без никаква реформа во нивната партија, со криминална матрица каква што беа и сè уште се. Јас ќе поставам едно реторичко прашање, за што Мицкоски бара референдум? Пред неколку денови Собранието донесе заклучоци со кои се задолжува Владата, оваа и секоја идна, да во текот на преговорите со ЕУ нема да смее да преговара за македонскиот јазик, идентитет и историја, а билатералните прашања да не бидат дел од преговарачката рамка. Дали ова им смета на ВМРО-ДПМНЕ и Мицкоски? Дали се против на она што го донесовме како заклучоци во Собранието со што ја обврзуваме Владата?“,
рече Коциќ.
За разлика од тврдењата на Мицкоски дека вистинските преговори ќе почнат со втората меѓувладина конференција односно по вметнувањето на Бугарите во Уставот, СДСМ тврди дека тие започнуваат утре, од кога ќе стартува и скринингот.
„Протоколот потврдува: воопшто не е поврзан и не ги условува почетокот на преговорите, тие започнуваат утре преку првата меѓувладина конференција и старт на скринингот. Потонати се сите лаги кои со недели ги пласираа антиевропските структури, Мицкоски, ВМРО-ДПМНЕ и нивниот проруски партнер Левица. Хистерично и под секое нормално човечко ниво, ширеа невистини, си поигруваа со чувствата на граѓаните, на Македонците. До ден денеска за ваквите срамни изјави и навреди нема никакво извинување. Точно 27 пати во протоколот се споменува терминот кој се однесува на реципроцитетот односно, ’двете држави‘. Точно толку земји членки на ЕУ ги слушнаа и видоа говорите на пратениците на Мицкоски кои им порачаа на сите нив дека и на фон дер Лајен, како и сите амбасадори кои беа присутни во собраниската салата дека се нацисти“,
рече пратеникот.