Присутните рекоа дека ако сите институции си ги извршувале своите задачи, до трагедијата немало да дојде и порачаа дека ќе ја бараат правдата за своите најблиски што ги изгубија во пожарот во т.н. кабаре
Во траор и болка голем број граѓани на Кочани денеска излегоа на најавениот протестен „Марш за ангелите“, што го организираа семејствата на починатите млади луѓе во трагедијата во т.н. кабаре „Пулс“.
Додека се движеа по предвидената рута, низ кочанските улици владееше мачна тишина, која на моменти ќе ја распараше плачот на дел од блиските на загинатите, кои во прегратка се обидуваа да си дадат некаква утеха.
На тивкиот и мирен протестен марш своите пораки присутните ги испратија преку испишаното на транспарентите што ги носеа дел од нив, покрај фотографиите од блиските што ги изгубиле во трагедијата.
„Ова не е несреќа, ова е убиство“, „Коруптивниот систем ги уби нашите деца“, „Марш за 59-те ангели“, пишуваше на дел од транспарентите.
Мирниот собир почна во Паркот на Револуцијата во 12 часот и 5 минути, како симбол на задоцнетата институционална реакција. Потоа граѓаните се упатија кон Трговскиот центар, кон зградата на Општина Кочани, Полициската станица и Основниот суд и Обвинителството.
Пред институциите се задржаа кратко, а една од мајките на починатите побара одговори за тоа кој е виновен за трагедијата што им ги одзеде најмилите.
„Кој ги уби нашите ангели, кој ги уби нашите херои и кој ги пеплоса тие ангелски лица?“
рече таа, пренесе МИА.
Присутните рекоа дека ако сите институции си ги извршувале своите задачи, до трагедијата немало да дојде. Маршот заврши на истото место од каде што и почна, а граѓаните нагласија дека ќе бараат правда за своите синови, браќа, сестри, братучеди, братучетки, внуци, сограѓани, кои загинаа во пожарот.
Додека се движеа низ улиците на Кочани, ним им се придружуваа граѓани кои сакаа да им пружат поддршка и да ја споделат тагата.
Во известувањето за протестот што вчера е доставено во кочанската полиција, организаторите исто така наведоа дека мирниот марш е за потсетување на институциите дека семејствата ќе ја бараат правдата за своите покојни деца сè до последен здив и дека ќе бараат брза и непрсистрасна истрага и судска постапка.
Во известувањето тие посочија и дека маршот е организиран исклучиво од семејствата на починатите во трагедијата и не е за лицата од обезбедувањето на т.н. кабаре и граѓаните кои не го прифаќаат таквото укажување не мора да се приклучуваат.
Имено, како што пренесоа дел од медиумите, вчера, а и претходните денови, извесен број кочанчани одржаа мирен протестен марш барајќи правда за обезбедувачите во т.н. кабаре, а кои се меѓу осомничените во истрагата за пожарот, бидејќи, според организаторите, спасиле многу животи кобната ноќ.
Инаку, за денеска попладне во 15:59 часот на социјалните мрежи беше најавен уште еден протестен марш под назив „Ваш профит – наши животи“, кој ќе има слична маршрута до институциите како и веќе одржаниот. Притоа, во најавата што беше објавена на социјалните мрежи, не е наведено кој го организира овој протест.