Со верификација на мандатите на пратениците од новиот парламентарен состав заврши првиот дел од конститутивната седница на Собранието.
Вториот дел, односно изборот на Комисија за избори и именување и претседател на Собранието ќе продолжи по постигнувањето политички договор за состав на новата Влада.
Од денеска, според Уставот, почнуваат да течат роковите за состав на новата Влада.
Претседателот на државата е должен во рок од 10 дена од конституирањето на законодавниот дом, мандатот за состав на Владата да го довери на кандидат на партијата, односно партиите што имаат мнозинство во Собранието. Мандатарот, пак, во рок од 20 дена од денот на доверувањето на мандатот, на Собранието треба да му поднесе програма и предлог состав на Владата.
Претседателот Пендаровски најави дека мандатот за состав на идната Влада ќе му го довери на оној кој ќе го увери дека стасал до мнозинство во Собранието, дури и пред истекот на рокот определн со Уставот.