Нови воздушни напади меѓу Израел и Газа кои го зголемија и бројот на жртви од двете страни. Во Газа досега се убиени најмалку 215 лица, вклучувајќи скоро 100 жени и деца, а животот го загубил и еден новинар од радиотот Ал акса, соопшти нивното Министерството за здравство. Според израелските власти, во Израел се убиени 12 лица меѓу нив и две деца.
Во еден од нападите од Израел кон Газа денеска беше уништена семејна куќа во која, според странските медиуми, загинале шест лица. Изралескиот премиер, Бенјамин Нетанјаху, изјави дека напади кон организацијата Хамас ќе продолжат се додека не е потребно. Тој вели дека им задале неочекувани удари со што значително ја намалиле силата на Хамас.
„Постојат само два начини за да се излезе на крај со Хамас. Или ќе ги победиме и тоа е сè уште отворена можност или ќе ги одвратиме од намерите. Ние сме во моментов ангажирани да ги одвратиме, но морам да кажам дека не исклучувам ниту една можност“,
изјави Нетанјаху.
Додека војната меѓу Израле и Газа трае, меѓународните и дипломатски напори за да се стави крај на насилството не даваат големи резултати.
Израел накратко отвори граничен премин во Газа за да дозволи минување на конвој со помош. Сепак, повторно беше затворен откако беше нападнат со палестински минофрлачи и ракети.
Обединетите нации објавија дека од почетокот на судирот, околу 52 илјади Палестинци во појасот Газа останале без своите домови, а од нив дури 47 илјади побарале помош во камповите на ОН.