Во понеделник попладне, пред крајот на работното време, Агенцијата за управување со одземен имот ја примила пресудата од Кривичниот суд во Скопје, со која се налага конфискација на движни и недвижни ствари на осудениот Сеад Кочан и неговата фирма „Трансмет“.
Вкупната сума која за која судот бара одземање на имотот е 17 милиони евра. Правната служба во Агенцијата веќе неколку дена го анализира имотот што е предмет на конфискација. Според проценките на институцијата, за период од една недела ќе треба да се провери – дали побарувањата на судот во корист на државата, се поклопуваат со моменталната фактична состојба.
Кривичниот суд пред една година ја донесе пресудата за „Труст“. По изрекувањето на пресудата, обвинителот на СЈО, Гаврил Бубевски, рече дека е задоволен и од предвидената затворска казна и од сумата која ќе треба да се врати на државата. Уште тогаш Бубевски кажа дека 90 насто од сумата која треба да се конфискува е привремено обезбедена. Тоа значи дека имотот е замрзнат и со него не се располага.
Епилог од конфискацијата очекуваат и државните институции. На дел од механизацијата на „Трансмет“ се надеваат во Електрани на Северна Македонија, како оштетена страна. Добивањето или недобивањето на таа опрема, битно ќе влијае на обемот на механизација кој ќе треба да се купи – велат од компанијата за „360 степени“.
Но, од Агенцијата за управување со одземен имот велат дека таква одлука допрва ќе треба да донесе Управниот одбор. Има две опции, или ќе ја донираат на ЕСМ или ќе ја продадат преку аукција.
Конфискацијата нема рок на извршување, но се’ поизвесно е дека парите на Кочан, најверојатно, ќе бидат првите средства кои ќе го завртат бројчаникот на Триумфална порта, кој го донираше премиерот Заев.