Претходно денеска Здружението на новинари на Македонија (ЗНМ) објави дека во простории на Комунална биле малтретирани двајца новинари
„Кон вработената во ЈП ‘Комунална хигиена-Скопје’, која денес предизвика инцидент, веќе е отпочната дисциплинска постапка“, валат од „Комунална хигиена-Скопје“
„Во иднина нема да дозволиме недолично однесување во претпријатието“ – се огласија од ЈП „Комунална хигиена-Скопје“ откако денеска Здружението на новинари на Македонија (ЗНМ) објави дека во простории на Комунална биле малтретирани двајца новинари.
„Истовремено кон вработената во ЈП ‘Комунална хигиена-Скопје’, која денес предизвика инцидент, веќе е отпочната дисциплинска постапка. Работниот процес мора да се одвива професионално и со почит кон секој. Претпријатието е отворено и транспарентно за сите граѓани и медиуми и во иднина нема да се дозволи недолично или несоодветно однесување во претпријатието, а се во насока на имплементација на реформи за подобри работни процеси во интерес на граѓаните“,
велат од „Комунална хигиена-Скопје“.
Претходно, ЗНМ ја осуди постапката на службеници од секторот за односи со јавност и од обезбедувањето на „Комунална хигиена – Скопје“ кои денеска сериозно ги прекршиле правата на новинарите Фуркан Салиу и Авни Тахири преку насилно одземање на нивната опрема и нивно незаконско задржување против нивна волја.
„Според колегите, овој скандалозен настан се случил денеска во просториите на ова јавно претпријатие во Скопје. Во овој инцидент службеничка која се претставила како одговорна за односи со јавност, по претходна вербална расправа со двајцата новинари, на колегата Салиу му го одзела телефонот и одбивала да го врати. Истовремено, тројца членови на обезбедувањето од дирекцијата на ‘Комунална хигиена – Скопје’, против волја на двајцата новинари ги задржале во просториите на оваа институција и истите биле ослободени дури откако пристигнале припадници на МВР, кои дошле набргу по претходна пријава од новинарот Тахири“,
соопштија од ЗНМ.
Од ЗНМ потенцираа дека инцидентот претставува тешка повреда на правата на новинарите и попречување во нивната работа како и правото на слободно движење.