Заменик-претседателката на Комисијата, Арта Биљали-Зендели, вели дека седницата е затворена, бидејќи завршиле двата дена за расправа во комисијата предвидени за закони со европско знаме и по скратена постапка. Таа рече дека од поднесените 388 амандмани, се разгледани само, поради тоа што, како што рече, опозицијата ја блокирала работата со процедурални забелешки
По два дена расправа, собраниската Комисија за европски прашања попладнево ја заврши расправата по предложените дополнувања на Законот за работни односи.
Заменик-претседателката на Комисијата, Арта Биљали Зендели, вели дека седницата е затворена, бидејќи завршија двата дена за расправа во комисијата предвидени за закони со европско знаме и по скратена постапка.
Вечерва во дебатата во емисијата ,,Топ тема” на ТВ Телма таа рече дека следнот чекор е Законодавно-правната комисија да каже дали овие предлог-измени се во согласност со Уставот и нема веќе комисиска дебата по нив.
Таа рече дека од поднесените 388 амандмани се разгледани само два, но, како што рече, не по нивна вина:
„Јас ги молев, но ВМРО-ДПМНЕ бараа процедурално. Кога дадов збор за амандманите, тие говореа процедурално и немаше расправа, туку само гласање за амандманите“,
рече таа.
Миле Лефков од ВМРО-ДПМНЕ, кој е член на оваа Комисија, во истата емисија рече дека е противуставно што не им била дадена можност за процедурална забелешка.
„Процедуралната забелешка е чување на процедурата, укажувате на прекршување на процедурата. Два дена барам процедурална забелешка, не добив право. Видовте дека има крената рака кога баравме измени и дополнување на дневниот ред. Повторно нула. Колку пати се гласаше по предлози за дополнување и изменување на дневниот ред – нула гласање. Времето кое се користеше беше на невидено насилие на Адеми. Да знаете дека е противуставно и противделовнички и вака донесен законот треба да падне на Уставен суд“,
рече Лефков.
Биљали-Зендели на ова одговори дека таа денеска им го прочитала текстот на одредбата од Деловниот за тоа кој има право на процедурална забелешка – координаторите и заменик-координаторите. Таа призна дека досега и во други комисии се дозволувало и членови и заменици членови да интервенираат процедурално.
„Но, морам да кажам дека откако почна активната блокада овие процедурални забелешки се злоупотребуваат и се користат премногу. Процедуралните забелешки се да се исправи процедурата – тие бараат процедура и влегуваат во материјална расправа и затоа одлучивме да се почитува Деловникот. Тоа досега што беше дозволено не е предвидено во Деловникот“,
рече Биљали-Зендели.
Во врска со она што се случи вчера, Биљали-Зендели рече дека тензиите се толку големи, особено со активната блокада и, според неа, опозицијата била блиску да ја постигне целта.
„Арбер е толку смирен и како човек ги развива односите со луѓето што мислам дека имаше многу големи провокации кои го извадија од колосек. Мислам дека други институции треба да кажат дали е исправно. Јас го поддржувам Арбер и сум против насилство. Не слушнав за дирекна провокација, но знаејќи го Арбер, знам дека имало силна провокација“,
рече Биљали-Зендели.
Лефков рече дека нивната цел била да спречат овој закон да се најде воопшто на дневер ред на Комисијата и да биде вратен.
„Не смее да се менува мандат на судии да со закон“,
рече Лефков.
По вчерашниот инцидент за време на седницата на Комисијата, денеска таа продолжи, а ја водеше заменик-претседателот на Комисијата, Арта Биљали Зендели. Таа и денеска се одвиваше во тензична атмосфера, со постојани барања од опозициските претставници за процедурални забелешки. Откако не добија, пратениците од ВМРО-ДПМНЕ скандираа и тропаа по маси. Побараа на седницата да присуствуваат и други владини претставници, а не само министерката за труд и социјална политика, Јованка Тренчевска.
Претседателот на Собранието, Талат Џафери, вчера попладне свика итна координација на која беа поканети сите координатори и претставници на политичките партии во Собранието. На поканата се одзваа координаторот на пратеничката група на СДСМ, Јован Митрески, потпретседателот на Собранието, Горан Мисовски, и пратеничката од Алтернатива, Сафије Садики Шаини. Иако поканети, не присуствуваа претставниците од опозициските партии ВМРО-ДПМНЕ и од Алијанса за Албанците.
Како што соопштија од собраниската прес- служба, на координацијата е донесен заклучок дека собранискиот Деловник ги дава сите можности за работа на Собранието и не дозволува насилство во која било форма.
„На координацијата се заклучи и тоа дека граѓаните самите ќе проценат од снимките кои се вртат по социјалните мрежи кој го предизвика инцидентот на Комисијата за европски прашања. Ниту во земјите членки на Европската Унија не се дозволува насилство врз претседавачот со седница на работно тело на Собранието“,
се вели во соопштението.