На координацијата е донесен заклучок дека собранискиот Деловник ги дава сите можности за работа на Собранието и не дозволува насилство во која било форма и дека граѓаните самите ќе проценат од снимките кои се вртат по социјалните мрежи кој го предизвика инцидентот на Комисијата за европски прашања
Претседателот на Собранието Талат Џафери, попладнево свика итна координација на која беа поканети сите координатори и претставници на политичките партии во Собранието. На поканата се оѕваа координаторот на пратеничката група на СДСМ, Јован Митревски, потпретседателот на Собранието, Горан Мисовски и пратеничката од Алтернатива, Сафије Садики Шаини. Иако поканети, не присуствуваа претставниците од опозициските партии ВМРО-ДПМНЕ и од Алијансата на Албанците.
Претседателот на Собранието ја свика координацијата откако членовите на опозициската ВМРО-ДПМНЕ, по цели два часа со процедурални забелешки се спротивставија да се изгласа дневниот ред на Комисијата за европски прашања, кој сепак беше изгласан.
Како што соопштија од собраниската прес- служба вечерва, на координацијата е донесен заклучок дека собранискиот Деловник ги дава сите можности за работа на Собранието и не дозволува насилство во која било форма.
„На координацијата исто така се заклучи и тоа дека граѓаните самите ќе проценат од снимките кои се вртат по социјалните мрежи кој го предизвика инцидентот на Комисијата за европски прашања. Ниту во земјите членки на Европската Унија не се дозволува насилство врз претседавачот со седница на работно тело на Собранието“,
се вели во соопштението.
Конфликтот ескалира откако претседателот на Комисијата, Арбер Адеми, се обиде да ја затвори расправата за дневниот ред на денешната седница, по што на говорницата во обид да земат збор, буквално со трчање, излегоа двајца пратеници на Алијансата, Халил Снопче и Елми Незири а зад нив, пратеничката на ВМРО-ДПМНЕ, Дафина Стојановска, го исклучи микрофонот на говорницата од која се води седницата.
Веднаш по неа пред позицијата од која се раководи со седницата излетаа повеќемина пратеници од ВМРО-ДПМНЕ, од кои, како што се гледа и на снимката, Антонијо Милошоски го витка и го потегнува на кај себе микрофонот на пултот пред претседателот на Комисијата.
Тоа предзвикува жестока реакција на Адеми кој исто така го повлекува микрофонот (по што прекинува тонската снимка) почнува да треска на пултот и да вика по пратениците кои се наоѓаат пред неговата маса. На снимката не се слуша какви зборови си разменуваат, но во еден момент, Адеми ја зема шољата за кафе и ја фрла кон нив, погодувајќи го во образот пратеникот на Алијанса, Хилми Азири. Потоа ја фрла и тацната.
По неуспешниот обид на неговата сопартијка од ДУИ, пратеничката Арта Биљали-Зендели да го смири, подавајќи му пластично шише со вода за да се напие, Адеми и шишето го фрла кон пратениците кои стојат и се расправаат со него.
Инцидентот се смирува откако реагира собраниското обезбедување кое го носи претседателот на Комисијата надвор од салата.
ВМРО-ДПМНЕ и Алијанса на Албанците се обидуваат да го спречат донесувањето законско решение со кое за да не се предизвика парализа на правосудниот систем, по предлог на Министерството за труд и социјална политика, на 60 судии и на 13 обвинители кои во септември треба да се пензионираат им се продолжува работниот ангажман за три години, период во кој од Академијата за судии и обвинители треба да излезе новата генерација нивни наследници.
Нивна клучна забелешка е тоа што ова решение не се носи по редовен пат, туку по скратена постапка.