Министерот за внатрешни работи Оливер Спасовски на денешниот брифинг со новинарите кажа дека службениците се приведени поради злоупотреба на службената положба
Командир, заменик-командир, раководител на смена и шест полицајци се уапсените во вчерашната голема акција што ја спроведоа Министерството за внатрешни работи (МВР) и Обвинителството за организиран криминал и корупција (ОЈО ГОКК) на граничниот премин „Табановце“.
Министерот за внатрешни работи Оливер Спасовски на денешниот брифинг со новинарите кажа дека службениците се приведени поради злоупотреба на службената положба.
Претреси имало и во домовите на службениците.
Дел од медиумите, повикувајќи се на свои извори, објавија дека при вчерашниот претрес на „Табановце“ во кабините на полицајците била пронајдена картонска кутија во која имало поголема сума пари во различни банкноти во денари, евра, швајцарски франци, американски долари и турски лири.
Синоќа на граничниот премин „Табановце”, МВР и ОЈО ГОКК спроведоа голема акција што предизвика големиот застој на граничниот премин. Колони возила беа заглавени на македонско-српската граница и по неколку часа, а граѓаните револтирани на социјалните мрежи објавуваа видеа и фотографии од километарските колони на граничниот премин.