Првиот вицепремер објави дека на главниот настан на 13 август ќе присуствува „авторот на оригиналниот нацрт на документот“ за Рамковниот договор, иако името што го спомна е релативно непознато во земјава во контекст на преговорите што се водеа за постигнување на договорот од Охрид
Првиот вицепремиер и министер за политички систем, Артан Груби, најави присуство на авторот на нацрт-верзијата на Рамковниот договор на главниот настан по повод дведеценискиот јубилеј од потпишувањето на политичкиот договор со кој беше означен крај на безбедносниот конфликт во земјава во 2001 година.
Како што соопштија од неговиот кабинет, Груби, во своето обраќање на научна дебата, организирана од универзитетот „Мајка Тереза“, меѓу другото, најавил „присуство на авторот на оригиналниот нацрт на документот за Охридскиот договор, американскиот адвокат Пол Вилијамс, на главниот настан на 13 август“.
Името на Пол Вилијамс е релативно непознато за пошироката јавност во земјава, во контекст на неколкумесечните преговори за постигнување на Рамковниот договор, што го потпишаа тогашните лидери на четирите најголеми партии во тоа време, под покровителство на тогашниот претседател Борис Трајковски, а со медијаторство на „олеснувачите“ од ЕУ и од САД, Франсоа Леотар и Џејмс Пердју.
На „Википедија“, Пол Р. Вилијамс е претставен како професор по право и меѓународни односи на Американскиот универзитет во Вашингтон. Во биографијата на „Википедија“ е запишано дека Вилијамс им помогна на дваесетина држави и субјекти во големи меѓународни преговори за мир, изготвување на законодавство и планирање политики. Како што се наведува, тој учествувал како претставник во преговорите за Дејтонскиот договор (Босна и Херцеговина), Договорот од Рамбуе и преговорите во Париз (Косово), преговорите за Охридскиот договор (Македонија) и преговорите Подгорица – Белград. Исто така, се посочува дека Вилијамс советувал десетина влади и партии во Африка, Азија и Европа, вклучувајќи ги Авганистан, Босна, Ирак, Косово, Црна Гора и Нагорно Карабах, како и претседателот на Македонија, претседателот на Естонија и министерот за надворешни работи на Црна Гора.
На дебата организирана од универзитетот „Мајка Тереза“, настан во рамки на програмата по повод 20-годишнината од Охридскиот договор, Груби истакнал дека потпишувањето на овој документ ги етаблираше високите општествени вредности на еднаквост и мирен соживот.
Меѓу другото, Груби ја елаборирал програмата на активности за одбележување на 20 -годишнината од Охридскиот договор, за што, како што рекол, е ангажирана секоја институција што е директен резултат на Охридскиот договор или е поврзана со него. Тој го објасни и значењето на мотото „По Охрид“.
“Она што до 2021 беше ‘до Охрид’, по 2021 година ќе биде ‘По Охрид’ и кој има храброст нека ни се придружи, бидејќи ќе го започнеме новото поглавје. За тоа ќе ни треба помош од сите три универзитети на албански јазик во нашата земја, од целиот академски свет, од целиот деловен свет, од целиот политички свет, затоа што ќе треба да изградиме нови концепти, во духот на Охридскиот договор, но да бидеме компатибилни со утрешниот ден, свесни за сегашноста во која живееме“.
рекол Груби.