Германскиот пратеник од владејачката партија ЦСУ, Тобијас Цех, кој си даде оставка откако беше откриено дека преку консултантска фирма вршел услуги за ВМРО-ДПМНЕ, кога претседател на партијата беше Никола Груевски, во германските медиуми беше претставен и како човек кој денес е тесно поврзан со бизнисот за одгледување канабис во Македонија
Бизнис-соработката на германскиот пратеник што си поднесе оставка не завршува со пиар-консултантските услуги, кои во екот на политичката криза во Македонија, во 2016 и 2017 година, му ги давал на Никола Груевски.
Тој, според германските медиуми, бил влезен и во зделка со лица од Македонија во бизнис за одгледување канабис.
„Денес 39-годишниот политичар е на чело на Управниот одбор на компанијата ‘Фарм кан‘ (PharmCann Deutschland AG) и со неа е тесно поврзан за одгледување канабис во Северна Македонија. Партнер на Цех во Скопје му е Златко Кесковски, поранешен заменик-директор на УБК и шеф на обезбедувањето на експретседателот Борис Трајковски. Кесковски е шеф на Надзорниот одбор на ’Фарм кан Германија‘ и има лиценца за одгледување канабис во Северна Македонија“,
пренесува „Дојче веле“.
За ова, Цех изјавил дека целта е да се изгради продажна мрежа за Германија.
Кој ја пресекуваше црвената лента за старт на производството во погоните на бизнис-партнерите на Цех во Македонија
Последната информација за Златко Кесковски, кого германскиот медиум го посочува како партнер на Цех во Скопје, беше објавена пред околу 5 месеци. На 14 октомври 2020 година, компанијата „НЈСК холдинг“, чиј извршен директор е тој, во индустриската зона „Ќојлија“ отвори нов производствен капацитет за одгледување канабис за медицински цели. На настанот присуствуваа и премиерот Зоран Заев, министерот за здравство Венко Филипче, како и амбасадорот на Полска во земјава Војциех Тицињски, со оглед дека, како што беше претставено, станува збор за полска инвестиција.
Заев тогаш истакна дека станува збор за гринфилд-инвестиција од фармацевтската индустрија која е изградена по највисоки стандарди.
„’НЈСК холдинг’ гради успешна деловна приказна во нашата татковина и извезува производи на сите континенти. Успехот на секоја една компанија е и национален успех“,
рече Заев во дел од своето обраќање.
Министерот Филипче, пак, се осврна и на досегашната соработка со „НЈСК холдинг“, со чија помош рече дека била воспоставена соработка со германското Министерство за здравство.
„Во изминатите две и пол години имавме одлична соработка. Благодарение на оваа компанија на господинот Кесковски и нивните соработници успеавме и да ја официјализираме комуникацијата и соработката со т.н. одделение за канабис при германското Министерство за здравство“,
рече Филипче.
Оваа компанија е формирана во август 2016 година.
Во анализа на „Призма“ од мај 2018 за тоа кој стои зад бизнисот со канабис, пишува дека прв сопственик на компанијата бил Владимир Кесковски, син на Златко Кесковски, кој, пак, се јавува како управител на фирмата.
„Во февруари 2017 година, ‘НЈСК холдинг’ го менува сопственикот и нов газда станува фирмата ‘Фаланкс олдингс’ ЛЛЦ регистрирана во сојузната американска држава Делавер, каде што е загарантирана анонимноста на сопствениците. Документите од Централниот регистар покажуваат дека лани во неколку наврати се зголемувал капиталот на компанијата, а до март годинава, основната главнина на ‘НЈСК холдинг’ надминува 900 илјади долари“,
пишуваше „Призма“.
Тогаш Златко Кесковски во изјава за „Призма“ изјавил дека зад „Фаланкс холдинг“ стојат вкупно девет компании, дека ниту еден тогашен функционер не е меѓу сопствениците, односно дека газдите се Американци, а компанијата е регистрирана во Делавер, не поради тајноста на инвеститорите, туку поради пониските даноци.
Првиот погон „НЈКС холдинг“ го отвори во април 2017 година во дел од просториите на некогашниот гигант ОХИС, каде што имплементираше затворен систем за производство и екстракција на канабис за медицински цели.
Тогаш на отворањето говореа ексминистерот за здравство Никола Тодоров, министерот за странски инвестиции Џери Наумов, а и тогашниот премиер Груевски го промовираше погонот како американска инвестиција.
Денеска, на официјалната веб-страница на „НЈСК холдинг“ пишува дека е дел од „ПХЦАНН интернешнл“.
„ПХЦАНН интернешнл“, пак, е претставена како една од најголемите компании во Европа во индустријата со канабис, чие седиште е во Полска, а има лиценцирани претставништва во Германија, Северна Македонија и во Хрватска.
„НЈСК холдинг“ шест месеци по основањето или во февруари 2017, како што пишува на веб-страницата, станува првата македонска компанија која добива лиценца за одгледување канабис за медицински цели.
Како дел од менаџментот на „НЈСК холдинг“, покрај Златко Кесковски како извршен директор, на веб-страницата е наведен и Сашо Стефановски, поранешен висок функционер на ВМРО-ДПМНЕ. Тој е претставен како човек кој има експертиза во областа на менаџирањето и управувањето и има искуство од високи позиции во државните институции: беше извршен директор на Фондот за здравствено осигурување, како и државен секретар во Министерството за одбрана и во Министерството за локална самоуправа. Дел од менаџментот е и сопругата на Златко, Искра Кесковска, за која пишува дека има долгогодишно искуство во корпоративното право и управувала со неколку сектори во јавни, приватни и невладини организации.
