Патоказот, краткото и долгото име на државава, немешање во внатрешните работи… се конкретните решенија што ги бара Радев и што верувам дека ќе ги сработиме до крајот на годината, вели премиерот
Патоказот, краткото и долго име на државата, немешање во внатрешните работи и, секако, преговарачката рамка, што е работа на ЕУ со Бугарија, се конкретните чекори што ги побара Софија и што се надевам дека ќе ги сработиме до крајот на годината, изјави денеска премиерот Зоран Заев, на прашање во врска со вчерашната средба на бугарскиот државен врв со еврокомесарот за проширување Оливер Вархеји.
Заев појасни дека прво треба да има дипломатска нота, во која ќе се наведе дека краткото име е исто со долгото име, односно Северна Македонија е исто со Република Северна Македонија и дека немаме територијални претензии, дека не се мешаме во внатрешните работи, како и во однос на малцинските права.
Голем дел од спомениците што ги има и во Бугарија и во Северна Македонија, како што рече премиерот, треба да бидат во пријателски дух, така што, посочи, фашизмот не смее да има етничка димензија.
„Кај одредени наши споменици тоа е веќе направено. Каде што стоело бугарски фашистички окупатор сега веќе е фашистички окупатор, затоа што не можете цела нација да обвините за тоа дека учествувала во Третиот рајх во тоа време“,
рече Заев.
На новинарско прашање дали ќе се менуваат учебниците по историја, Заев посочи на термини каде што, како што рече, пријателската нација се поврзува со фашистичкиот окупатор.
„Никаде во Европа не се спомнува името на нацијата. Се спомнува фашистичкиот окупатор и во тој дух, во духот на пријателството, соработка и добрососедство, нормално, очекуваме тоа да се направи. Имаме препознаено одредени слабости и во бугарските учебници, спремни се, исто така, и од бугарската страна тоа да го направат, зашто така се гради пријателство, наместо да оквалификувате цела една нација за одредена определба во тоа време“,
истакна Заев.
Според него, во изминатите месеци се надградува пријателството си Бугарија во речиси сите области.
„Трговијата расте, имаме меѓусебни инвестиции во двете земји, соработката помеѓу институциите е се повидлива, инфраструктурата помеѓу двете земји се повеќе и повеќе се подобрува, затоа што не е само правно формално што ќе се договори, туку важно е и да ја подобруваме севкупната соработка и инфраструктурното поврзување помеѓу двете земји“,
рече Заев.
Тој, исто така, изрази подготвеност Бугарија да биде вториот партнер на државава, покрај Грција, кој ќе се грижи за македонското небо.