За помалку од 2 седмици бизнисменот Сеад Кочан ќе мора да се пријави на издржување на затворската казна. Кривичниот суд ја одбил неговата молба за одложување на извршувањето на санкцијата.
„Во однос на повеќе новинарски прашања доставени до Основниот кривичен суд – Скопје, во однос на предметот од обвинителството означен како „Труст“, ја информираме јавноста дека молбата за одлагање на извршувањето на санкцијата е одбиена како неоснована и истата е доставена до странките во постапката“,
соопшти денеска Кривичниот суд.
Бизнисменот кој се поврзуваше со врвот на ВМРО-ДПМНЕ е осуден на казна затвор од 4 години и 8 месеци за чие издржување Кочан треба да се пријави на 17 јули. Првостепениот суд првично му одреди 6 годишна затворска казна која Апелација ја намали за речиси година и половина. Кочан, како управител на „Трансмет“ е осуден за незаконско добивање тендери за ископ на јаглен во РЕК Битола.