Од Клиниката за нефрологија информираат дека во последните три години (период 2017-2020), направени се вкупно 55 трансплантации на бубрези. Од вкупниот број, од починат дарител се изведени 10 трансплантации, со што 10 пациенти добиле бубрег.
„Во 2020 година, пред почнувањето на ковид пандемијата беа изведени четири трансплантации од жив дарител. Во месец мај 2020 година, во екот на пандемијата беше изведена првата кадаверична трансплантација од која органи добија двајца пациенти, но кај еден пациент трансплантираниот бубрег не беше прифатен. Во текот на вчерашниот и денешниот ден тимовите од Клиниките за нефрологија и урологија изведоа две кадаверични трансплантации – двајца пациенти добиваат бубрег. На пациентите им посакуваме успешен тек во процесот на опоравување“,
порачуваат од Клиниката.
Со трансплантацијата на бубрези, нагласуваат оттаму, пациентите повеќе не одат на дијализа и квалитетот на живот значително им се подобрува.
За трансплантациите кои почнаа вчера, Министерството за здравство информираше дека двата бубрега се од 46 годишен пациент кај кој била потврдена мозочна смрт. Еден од пациентите кои добија бубрег е 35-годишна девојка која неколку години одела на дијализа.
Починатиот дарител, како што беше објавено вчера, е државниот правобранител за подрачјето на Велес, Борче Пинев.
За жал, рече министерот за здравство Венко Филипче, не можеле да најдат соодветен примател за неговото срце и тоа не беше трансплантирано.
„За жал, овој пат немавме соодветен примател на срцето и тоа нема да биде трансплантирано. Му се заблагодарувам на семејството на донорот, кое во моментите на најголема болка одлучи да ги донира органите и да спаси уште најмалку два животи. Да се донесе одлука да се даруваат органите на блискиот во моментите кога го губите засекогаш, е тешко. Потребно е многу сила, многу љубов и хуманост да мислите на нечиј туѓ живот кога го губите саканиот. Луѓето кои носат вакви одлуки се посебни. Бескрајно сме им благодарни што уште еднаш ни покажаа дека живот сепак може да се подари“,
напиша Филипче.