Клан ТВ е во фаза на екипирање на нов состав на вработените и ќе истражиме дали овој инцидент е намерен од страна на актуелни или веќе отпуштени вработени за да се наштети на телевизијата, информираа оттаму
Откако вчера телевизијата Клан Македонија информира дека лидерот на Алијанса на Албанците, Арбен Таравари, се сретнал со лидерот на ВМРО-ДПМНЕ, Христијан Мицкоски, во седиштето на најголемата опозициска партија во Скопје, од телевизијата денеска соопштија оти го повлекуваат соопштението со, како што наведуваат, непотврдената информација.
„Клан го повлекува вечерашното соопштение и ќе поведе постапка за одговорност кон новинарот којшто неавторизирано испратил мејл до други медиуми со непотврдена информација. Клан ТВ е во фаза на екипирање на нов состав на вработените и ќе истражиме дали овој инцидент е намерен од страна на актуелни или веќе отпуштени вработени за да се наштети на телевизијата. Се извинуваме на засегнатите страни и на медиумите и во целост ја повлекуваме испратената непотврдена информација“,
се наведува во дописот на телевизија Клан испратен до медиумите.
Телевизијата вчера објави и фотографија за која тврдеше дека е направена во гаражата на седиштето на ВМРО-ДПМНЕ, а на која наводно бил прикажан автомобилот на Таравари.
Од ВМРО-ДПМНЕ вчера демантираа дека се одржала средба Мицкоски–Таравари, а демантот партијата го адресираше до министерот Артан Груби, од каде што му порачаа дека не би можел да знае дали лидерот на Алијанса на Албанците бил во „Белата палата“, бидејќи бил на пазарење во луксузни продавници во Австрија. Од ВМРО-ДПМНЕ објавија и фотографии од „шопингот“ на Груби.