Претседателот на Собранието, Африм Гаши, денеска ги распиша изборите за градоначалник за 18 октомври откако неодамна ненадејно почина првиот човек на општината, Јовица Илиевски
Државната изборна комисија (ДИК) попладнево на седница го усвои Роковникот за предвремените избори за градоначалник во Брвеница и избра претседател, заменик-претседател и членови на Општинската изборна комисија. Претседателот на Собранието, Африм Гаши, денеска ги распиша изборите за градоначалник за 18 октомври откако неодамна ненадејно почина првиот човек на општината, Јовица Илиевски.
Претседателот на ДИК, Бојан Маричиќ, на седницата истакна дека Комисијата и официјално ги започна сите оперативни активности за спроведување на предвремените избори за градоначалник.
„Како и досега, ДИК останува посветена на својата законска и уставна улога да биде заштитник и гарант на демократското избирачко право. Ја уверувам јавноста дека ќе ги преземеме сите мерки за изборниот процес да се одвива целосно, транспарентно, во фер и демократска атмосфера во согласност со највисоките стандаради за спроведување избори овозможувајќи им на граѓаните на општина Брвеница слободно и достоинствено да ја изразат својата волја на 18 октомври 2026 година“, рече Маричиќ.
Членот на ДИК, Борис Кондарко, информира за најважните датуми од Роковникот на предвремените избори за градоначалник на Брвеница. Јавниот увид во Избирачкиот список започнува на 22 август и трае 20 дена, односно до 10 септември, а граѓаните тоа ќе можат да го направат во подрачното одделение на ДИК во Брвеница и доколку има потреба да побараат корекција на личните податоци. Собирањето потписи за кандидати за градоначалник почнува на 17 август и трае до 15 дена, до 31 август. Изборната кампања започнува на 21 септември, а ќе трае дваесет дена, односно до 16 октонври. Поднесувањето на кандидатските листи до ОИК Брвеница е до 12 септември.
Поради тоа што им беше истечен мандатот на ОИК Брвеница, денеска по случаен избор беа избрани претседател, заменик-претседател, членови и заменик-членови на ОИК Брвеница.
Исто така, ДИК ќе упати барање до МВР за ажурирање на Избирачкиот список, донесена е одлука за ангажирање лица за помошни тела и тоа во делот на информатичкиот сектор, а утврден е и износот за платено политичко рекламирање за медиуми кои не биле пријавени последните пет години.