Од утрово започна отстранувањето на барикадите што беше најадено од Вучиќ, а како што јавуваат српските медиуми тоа сè уште трае
КФОР ја поздрави одлуката за отстранување на барикадите што ги постави српското население на северот на Косово и порача дека тоа треба да се направи брзо и на безбеден начин, но и дека сите страни треба да избегнуваат реторика или дејствија кои може да предизвикаат нова ескалација на ситуацијата.
„КФОР го следи развојот на настаните. Остануваме крајно внимателни и подготвени да интервенираме ако биде неопходно во согласност со нашиот мандат заснован на Резолуцијата 1244 на Советот за безбедност на ОН од 1999 година“,
наведува КФОР, пренесува РТС.
Повлекувањето на барикадите претходно го најави претседателот на Србија Александар Вучиќ, а откако разговараше со Србите од Косово.
Од утрово започна нивното отстранување, а како што јавуваат српските медиуми тоа сè уште трае.
Последната информација што ја пренесува екипата на Н1ТВ е дека во местото Рудар на северот на Косово е отстранета најголемата барикада и сообраќајот се одвива нормално, а се отстрануваат и оние поставени во околината Зубин Поток, како и дел од тие што биле поставени на патот кон граничниот премин „Јариње“.
Засега неизвесно е само кога би се отстранила барикадата на мостот во Косовска Митровица кој ги спојува северниот и јужниот дел од градот.