Министерот за надворешни работи денеска нагласи дека очекува да се одржат консултации, но и нагласи дека процедурата е во фаза кога е добиен агреман од Париз и сега треба да помине во Комисијата за надворешна политика во Собранието. Тој посочи и оти треба да биде донесена политичка одлука односно нема да се чекаат резултатите од истрагата за случајот со Онишченко
Ќе замине ли поранешниот директор на Агенцијата за национална безбедност (АНБ) Виктор Димовски за амбасадор на Северна Македонија во Франција, ќе се знае по консултациите кои ќе ги направат претседателот Стево Пендаровски, премиерот Димитар Ковачевски и министерот за надворешни работи Бујар Османи.
Шефот на дипломатијата денеска најави дека деновиве очекува се одржат консултациите со оглед дека Димовски беше на чело на безбедносната агенција во период кога изби скандалот со доделувањето државјанство на Олександр Онишченко, за што позитивно мислење имаше и од АНБ.
„Процедурата е до фаза кога треба да помине во Собрание во Комисија за надворешна политика, бидејќи е добиен агреманот, одбранети се тезите и треба да оди во Комисија за надворешна политика. Меѓутоа, како што знаете и претседателот иницираше процес на консултации помеѓу претседателот, премиерот и мене, како министер за надворешни работи, за да ја процениме состојбата после овој развој на настани и после ќе донесеме на одлука. Досега нема донесена одлука по однос на амбасадорот, но верувам наредните денови ќе имаме таква консултација“,
изјави денеска Османи.
Министерот потенцира дека треба да биде донесена политичка одлука, како и дека нема да се чекаат резултатите од истрагата.
„Сигурно дека резултати од истрагата ќе ни помогнат во нашата одлука, но сепак тука се работи за политичка одлука и за политички консултации“,
изјави Османи.
На оваа тема, претседателот Пендаровски пред еден месец излезе со став дека ако се утврди дека Димовски е одговорен за издавањето македонско државјанство на Онишченко, тој нема да оди за амбасадор во Париз.
ВМРО-ДПМНЕ веќе побара од власта да не го праќа поранешниот директор за амбасадор во Франција. Потпретседателот на партијата, Александар Николоски, во гостувањето во емисијата „360 степени“ на 25 ноември годинава рече дека и самата номинација е спорна бидејќи Димоски е директор на тајна служба, што не е пракса во европските земји такви кадри да се испраќаат за амбасадори.
„За мене и самата номинација е спорна затоа што да пратите директор на тајна служба за амбасадор, тоа не е некоја добра порака кон Франција. Во регионот така разузнавачи знаат да пратат Србите, Бугарите. Но, тоа најчесто го прават во соседството. Не сум слушнал дека досегашен директор на БИА во Србија или ДАНС во Бугарија е испратен за амбасадор во Париз, да не зборувам за посериозни држави“,
рече Николоски.
Како втор спорен момент тој го наведе и скандалот со Онишченко и порача дека Димоски треба да биде доволно доблесен и самиот да се повлече.