Министерот Венко Филипче на денешната прес-конференција зборуваше за масовен скрининг на населението и појасни дека тоа не е мерка која ќе ги опфати сите. Деновиве, најави тој, таков процес може да започне во Струга.
„Кога викаме масовен скрининг не е тоа мерка која може да се направи на било кого. Сепак, мора да има и минимум индикација на што работат епидемиолозите. Некаква епидемиолошка врска со која било група на луѓето кои сега се дијагностицирани, понатаму една друга група на претходно заболени од грип кои може да се тестираат на овој вирус според епидемиолошките податоци и сетоа тоа географски распоредено низ државата согласно податоците за тоа од каде биле или патувале одредени групи на луѓе. Тоа е нешто на што сега се работи. Конкретно веќе може овие денови да се почне во околината на Струга заради интензивната комуникација која ја имале овие лица со лицата кои се сега во зоната на Дебар, а другите мерки веројатно ќе се дефинираат викендот, па веројатно може да се почне таква акција од следниот понеделник“,
најави Филипче.
Тој потоа и појасни која е групата на луѓе до која сакаат да стигнат, иако, рече, тоа е навистина тешко.
„Во принцип насоките и препораките од СЗО е да не се тестираат лица кои немаат симптоми. Но, сакаме да стигнеме до лицата кои евентуално биле во контакт со некој заболен или дојден од ризичен регион, а не се поминати 14 дена па да може да покаже симптоми. Сакаме таа критична група некако да ја лоцираме. Навистина е тешко, тоа е голем предизвик за епидемиолозите, но работиме на тоа“,
рече министерот.
Тој зборуваше и за количината на тестови за коронавирус, порачувајќи дека има доволно количини.
Во моментов, рече Филипче, има околу 1 500 тестови, а има најава за донација од уште 1 000 тестови, како и набавка на други 1 000.
„Имаме информација дека нашата земја може да смета на количина од илјада тестови неделно заради тоа што побарувачката во моментот во сите земји е голема“,
рече Филипче.
Во однос на тоа дека здравствена установа од внатрешноста се жали на недостиг на заштитни маски и ракавици, Филипче рече дека до него не стигнала ваква информација.
„ Редовно комуницираме со сите јавни здравствени установи и тие во рамки на својата организациона поставеност имаат направено реорганизација“,
рече Филипче, додавајќи дека може да ја проверат која било јавна здравствена установа.