Прашан дали имал комуникација со грчките колеги за евентуални заеднички активности околу ова прашање, бугарскиот премиер рече дека досега не разговарал со нив, но оти претпоставува дека и Грција нема да седи настрана и дека и таа ќе земе учество
Очекувам да се запазат договорите и затоа ќе ги потсетам колегите какви обврски беа преземени уште на 18 јули 2022 година кога беше усвоена Преговарачката рамка и какви се патоказите за прием на Република Северна Македонија, изјави премиерот на службената влада на Бугарија, Димитар Главчев по пристигнувањето на Самитот на Советот на Европската Унија што денеска и утре ќе се одржи во Брисел.
„Во декември 2023 година веќе беше малку повеќе конкретизирано и фокусот беше точно на уставните измени. Но, во последно време гледаме изјави, ајде, од партиски лидери добро, но и од владини раководители во Република Северна Македонија дека нема да се прават такви промени и едноставно ќе ги запознаам колегите од Европскиот совет какви се расположенијата и ќе ги потсетам што се случувало претходно по ова прашање“,
изјави Главчев пред бугарските медиуми, кои прво покажаа интерес за оваа тема.
Прашан дали имал комуникација со грчките колеги за евентуални заеднички активности околу ова прашање, бугарскиот премиер рече дека досега не разговарал со нив, но оти претпоставува дека и Грција нема да седи настрана и дека и таа ќе земе учество.
„За мене е важно да покажам каква е бугарската позиција, која впрочем е и европска позиција“,
изјави бугарскиот премиер.
Главчев не беше конкретен околу тоа во каква форма ќе го постави ова прашање како тема на состанокот, иако во соопштението што утрово беше објавено на веб-страницата на бугарската влада, беше наведено дека Софија ќе бара во заклучоците од дводневниот самит на лидерите на Европската Унија да биде вклучен и текст за Република Северна Македонија.
„Ќе видам каква ќе биде формата, според мене откако веќе има заклучоци, кои веќе ги споменав, не е толку важно да имаме заклучоци кои ќе препраќаат кон стари заклучоци, прашањето е да потсетиме што веќе се случило“,
рече Главчев, додавајќи дека за Бугарија тоа е важна тема.
Инаку, од бугарската влада претходно соопштија дека Главчев за време на дискусијата ќе бара од Европскиот совет да ги потврди заклучоците за Северна Македонија од декември лани и од 18 јули 2022 година и да ја повика земјава да ги преземе чекорите наведени во нив за напредок на патот кон европската интеграција.
„Бугарија ќе инсистира Европскиот совет при усвојувањето на заклучоците од состанокот да вклучи и текст за Република Северна Македонија.
Премиерот Димитар Главчев денеска и утре ќе престојува во Брисел, каде за време на дискусијата на темата ќе побара од Европскиот совет да ги потврди заклучоците од 14 декември 2023 година, како и заклучоците на Советот за Северна Македонија и Албанија од 18 јули 2022 година и да ја повикаат Северна Македонија да ги преземе чекорите наведени таму за да постигне напредок на нејзиниот пат кон европската интеграција.
Според бугарскиот премиер, важно е да се истакне дека имплементацијата на сите заложби, како и напредокот на сите реформи поврзани со ЕУ, остануваат клучни“,
пишува во соопштението на бугарската влада.
За потсетување, заклучоците од 14 декември лани, чија потврда ќе бара Главчев во Брисел, се од Самитот ЕУ –Западен Балкан. Во декларацијата која тогаш беше усвоена од лидерите на Унијата, во консултација со лидерите на шесте земји од Западен Балкан, меѓу другото, пишува и дека ЕУ ја нагласува потребата од спроведувањето на Преспанскиот договор со Грција и Договорот за пријателство, добрососедство и соработка со Бугарија.
„Спроведувањето на билатералните договори, меѓу кои Преспанскиот договор со Грција и Договорот за пријателство, добрососедство и соработка со Бугарија, останува значајно да се спроведат со добра волја и видливи резултати. Сѐ уште се неопходни одлучни дополнителни напори за да се поттикнат помирувањето и регионалната стабилност, а исто така и да се пронајдат и да се спроведат конечни, инклузивни и обврзувачки решенија во однос на регионалните и билатералните спорови и прашања меѓу партнерите, вкоренети во наследството од минатото – во согласност со меѓународното право и воспоставените принципи…“,
беше наведено во овој дел од Декларацијата.
Овој заклучок дојде по оние што Советот на ЕУ ги усвои на 18 јули 2022, еден ден пред одржувањето на првата Меѓувладина конференција. На неа беше усвоена Преговарачката рамка за членство на земјава во ЕУ со што започна процесот на скрининг, а одржувањето на втората Меѓувладина конференција по која треба да почне процесот на отворање кластери и пoглавја беше условено со измени на Уставот што треба да ги направи земјава за вклучување на Бугарите во Преамбулата.
Најавата за позицијата на Софија што премиерот Главчев планира да ја пренесе на самитот во Брисел денеска и утре, доаѓа по размената на ставови меѓу новата македонска влада на чело со премиерот Христијан Мицкоски и дел од раководството и главните политички актери во Бугарија околу Преговарачката рамка и како понатаму на патот на земјава кон ЕУ.
Инаку, главни теми на дводневниот самит на Европската Унија што почнува попладнево во Брисел ќе бидат изборот на носителите на водечките раководни позиции во ЕУ, Стратешката агенда 2024–2029 година, состојбите во Украина и на Блискиот Исток, безбедноста и одбраната, конкурентноста, миграцијата, хибридните напади и прашања од надворешната политика.