Во дискусијата, Дамева рече дека целта е таа да се разреши бидејќи има сензитивни точки. И да си одам и да го изгласате моето разрешување, рече таа, ќе одам со гордо крената глава, а додека сум претседател нема да има простор за влијание и не се плашам од притисоци и закани
Караници, обвинувања и меѓусебни прозивки можеа да се слушнат на денешната седница на Судскиот совет. Иницијална каписла беше писмото од американската амбасадорка Анџела Агелер во кое таа ја изразува својата и загриженоста на САД за состојбите во правосудството.
Заменик-претседателот на Судскиот совет, Селим Адеми, ја обвини претседателката Весна Дамева дека го криела писмото од другите членови, а таа, пак, се правдаше дека била на одмор, јави Телма ТВ.
Обвинувања на адреса на Дамева тој упати и за тоа дека таа го блокирала изборот на судии во Апелација со непотпишување на анекс-договорот, на што претседателката одговори дека нема да потпишува штетни договори.
Адеми дури спомена дека треба да се избере нов претседател од редот на судиите – Дамева да даде оставка или, пак, да се предложи нејзино разрешување. Досега, Законот за Судски совет не дозволуваше претседателот и заменик-претседателот да бидат од редовите на судиите, но патот за такво нешто се отвори откако Уставниот суд неодамна ја укина таквата законска одредба.
Во дискусијата, Дамева рече дека целта е таа да се разреши бидејќи има сензитивни точки.
„И да си одам и да го изгласате моето разрешување, ако има законска основа, ќе си одам. Но, со гордо крената глава. За овие четири месеци, признале или не, овој Судски совет се отвори за јавноста, има добра работа со меѓународната заедница. Ако не сакаме на европскиот пат, сакаме да одиме по патот на заборав. Не знам што ќе се случи натаму со Судскиот совет, за понатаму не знам. Додека сум претседател, нема да има простор за влијание. Знам, ќе го оспорите ова, јас кажувам – не се плашам од притисоци и закани, па по цена и да си одам. Ако ова е крајот, треба да утврдите моја одговорност, па да наведете основата зошто ми го одземате мандатот, а не поради ваши желби и желби на ваши блиски луѓе“,
посочи Дамева, која во дискусијата рече и дека се согласува со критиките, а го прозва и заменик-претседателот зашто тој не го презентирал писмото на членовите кога таа била на одмор, пренесе „Макфакс“.
За тензијата во Судскиот совет вчера пишуваше и порталот „Сакам да кажам“ во текст во кој наведе дека веќе една недела имало иницијатива за одговорност на апелацискиот судија Енвер Беџети за кого беше констатирано дека девет месеци го „чувал“ предметот за масовното прислушување „Таргет-Тврдина“.
Пред неколку дена, според информациите од порталот, на колегиум во Судскиот совет иницијативата била блокирана од членови предводени од заменик-претседателот Селим Адеми и членот Миљазим Мустафа, кои барале место иницијативата да оди веднаш на седница и веднаш да се формира тричлена комисија, како за останатите судии за кои досега се барало одговорност, таа времено да се стопира.
Судијата периодов беше и кандидат за врховен судија, но првиот обид за избор пропадна кога ниту тој ниту останатите кандидати не добија доволно гласови. Порталот пишува дека група членови на Советот предводени токму од Адеми, сепак, притискаат Беџети по секоја цена да стане врховен судија.