Средбата на селекторот Милевски со членовите на Управниот одбор на ФФМ е најавена за утре во 13 часот, а на која е предвидено да се разговара и околу најновите случувања, најавата за заминувањето на капитенот Стефан Ристовски, како и околу резултатите кои не одат во посакувана насока во квалификациите за ЕВРО 2024
Македонската фудбалска репрезентација во наредниот период ќе настапува без капитенот Стефан Ристовски. Тој, преку објава на својот инстаграм-профил, објави дека се повлекува од националниот тим.
Во објаснувањето на оваа одлука, Ристовски како причина ги наведува нарушените односи со селекторот Благоја Милевски.
„За доброто на репрезентацијата во наредниот период сакам да се повлечам. Во професионалниот фудбал не треба само да истрчаш на зелениот терен. До успех се доаѓа со план, визија, идеја, сплотеност, услови и почит кон секој репрезентативец за на крај да оствариш успех. За македонската фудбалска репрезентација секогаш сум играл и сум се борел со цело срце, искреност и љубов, како во соблекувалната и на терен. И покрај сите мои напори и вложувања гледам дека во репрезентацијата работите одат во погрешна насока, тоа го покажуваат резултатите. Односот меѓу мене и сегашниот селектор Благоја Милевски не е во најдобар ред за што лично сме разговарале и му било предочено од моја страна, како капитен за сѐ она што се случува во и околу репрезентацијата“,
се наведува во објавата на Ристовски.
Македонската фудбалска репрезентација изминатиот период претрпе пораз од 2:3 на домашен терен од Украина, а на гостувањето во Манчестер на „Олд Трафорд“ загуби катастрофално со резултат од 7:0 од репрезентацијата на Англија.
По слабите резултати на репрезентацијата, од ФФМ најавуваа можна смена на Благоја Милевски, но одлука за тоа немаше, а на негово инсистирање утре треба да се одржи средба на која се очекува селекторот да ги образложи причините за двата пораза.
Средбата на селекторот Милевски со членовите на Управниот одбор на ФФМ е најавена за утре во 13 часот, а на која е предвидено да се разговара и околу најновите случувања, најавата за заминувањето на капитенот Стефан Ристовски, како и околу резултатите кои не одат во посакувана насока во квалификациите за ЕВРО 2024.
Стефан Ристовски за капитен на репрезентацијата беше поставен по повлекувањето од националниот тим на Горан Пандев.