Камчев вчера направил брз антигенски тест за ковид-19 и е позитивен, но чека решение за самоизолација, рекоа неговите адвокати
Судењето за случајот „Плацови на Водно“ денеска се одложи поради отсуство на четворица од повиканите сведоци и по барање на одбраната на обвинетиот Орце Камчев, кој од вчера е позитивен на ковид-19.
Според одбраната на Камчев, кој денеска присуствуваше во судницата во Основниот кривичен суд во Скопје, Камчев вчера направил брз антигенски тест за ковид-19 и кај него е детектиран вирусот, но чека решение за самоизолација.
Камчев седна на спротивната страна од останатите присутни и беше сам. Адвокатот Гоце Ристевски појасни дека имал конткат со заболено лице, па пројавил симптоми на вирусот.
„Согласно Уредбата на Владата предвидена е задолжителна самоизолација, а овие околности се познати и на Јавниот обвинител, иако обвинетиот Камчев согласно Уредбата треба да е во самоизолација, а тој е присутен исклучиво по ценење на одбраната и негово лично, од причина што сè уште нема Решение за самоизолација“,
рече Ристевски.
На тврдењата на адвокатите на Камчев реагираше обвинителката Лиле Стефанова. Таа не верува во она што го тврдат адвокатите, бидејќи Камчев заедно со нив, изминатите две недели доаѓал во Обвинителството за да врши увид во доказите за истрагата „Империја“ која се води против него. Тогаш, според Стефанова, тој тврдел дека се тестирал и имал негативен резултат на вирусот.
„Тестот кој е изготвен вчера покажува дека лицето имало некогаш контакт со вирусот, а не дека е позитивен на вирусот“,
рече Стефанова.
Камчев се тестирал во приватната болница „Аџибадем Систина“.
Случајот го води судијата Илија Трпков, а застапник на обвинението е обвинителката Лиле Стефанова.
Според обвинението, Никола Груевски е обвинет за делата перење пари и за противправно стекнување и прикривање имот, неговиот кум Ристо Новачевски, бизнисмените Ненад Јосифовиќ, Јордан (Орце) Камчев и Ратка Куновска Камчева се товарат за перење пари, а првиот братучед на Груевски и поранешен директор на УБК, Сашо Мијалков, е обвинет за помагање при кривично дело перење пари и други приноси од казниво дело.