Судскиот совет ќе утврдува дали има пропусти во претходните постапки кои се воделе против 20-годишникот, информира претседателот на ова тело, Александар Камбовски
Судскиот совет веќе започна да ги разгледува претходните судски случаи против Васил Јованов – возачот кој со автомобил смртно ја прегази 20-годишната Фросина Кулакова на булеварот „Партизански одреди“ во Скопје. Ќе се утврдува дали има пропусти во претходните постапки кои се воделе против 20-годишникот.
За ова денеска информира претседателот на Судскиот совет, Александар Камбовски, додавајќи дека во врска со случајот ова тело ќе постапи по сите забелешки од страна на јавноста.
„Започнавме со разгледување на случаите, а утре и формално ќе биде формирана комисија од страна на Судскиот совет и по извршениот увид во сите тие списи ќе излеземе со став дали имало пропуст или немало. Ќе бидат разгледани сите забелешки кои што беа изнесени во јавноста и по сите нив ќе се постапува“,
рече Камбовски.
На Васил Јованов во јули минатата година Основниот кривичен суд му одредил воспитна мерка и го упатил во воспитно-поправниот дом во Тетово од постапката во која му се судело за неовластено производство и пуштање во промет на наркотични дроги и прекурсори.