Таа посочи дека некои земји се премногу фокусирани на посредување, наместо да вршат политички и економски притисок врз Русија за да ја запре војната
Високата претставничка на Европската Унија за надворешна политика и безбедност Каја Калас вели оти дипломатските контакти меѓу САД и Русија покажуваат дека Москва не се откажува од своите територијални цели во Украина, што, според неа, испраќа опасен сигнал.
За време на состанокот на министрите за надворешни работи на Г-20 во Јужноафриканската Република, Калас нагласи дека претседателот Доналд Трамп со својата одлука да преговара директно со Русија без вклучување на Украина предизвикал загриженост кај европските партнери. Тоа е, како што вели Калас, поради неговиот пристап за ставање крај на конфликтот што ќе биде од корист за Русија.
„Јасно ни е од овие контакти дека Русија не се откажала од своите цели. Тие сакаат да добијат максимум и уште повеќе. Ако му дадеме сè на агресорот, тоа испраќа сигнал до сите агресори во светот дека можат да го сторат истото“,
вели Калас, пренесува Ројтерс.
Таа посочи дека некои земји се премногу фокусирани на посредување, наместо да вршат политички и економски притисок врз Русија за да ја запре војната.
Според Калас, клучното прашање, кое често се игнорира, е дека Русија не сака мир.
Таа додаде дека е прерано да се зборува за испраќање мировни трупи во Украина пред да биде постигнат прекин на огнот, тема што се дискутираше меѓу европските лидери во Париз оваа недела.
И британскиот министер за надворешни работи Дејвид Лами, како што пренесува Ројтерс, изјавил дека не гледа никаква подготвеност од страна на Москва за мир откако го слушнал говорот на рускиот министер за надворешни работи Сергеј Лавров на состанокот во Јоханесбург.
„Мора да кажам, откако ги слушнав Русите и Лавров денеска, не гледам никаква вистинска желба за мир“,
изјавил Лами.
Во вторникот имаше состанок меѓу Русите и Американците во Ријад – Саудиска Арабија.
Од руска страна на средбата беа рускиот министер за надворешни работи Сергеј Лавров и советникот на Путин за надворешни работи Јуриј Ушаков, додека во американската делегација беа државниот секретар Марко Рубио, советникот за национална безбедност Мајк Волц и специјалниот пратеник Стив Виткоф.
Американската страна нагласи дека средбата не е за започнување преговори, туку за утврдување дали Русија е сериозна за завршување на војната во Украина.
Русија вели дека нејзин приоритет е да започне нормализирање на односите со САД.
Трамп во средата го нарече украинскиот претседател Володимир Зеленски „диктатор“ и го повика да прифати мировен договор со Русија, предупредувајќи дека во спротивно ризикува да ја загуби својата земја.
Зеленски на обвинувањата одговори велејќи дека Трамп е заробен во „балон на дезинформации“ што доаѓа од Русија.