Околу илјада млади (од 15 до 29 години) аплицирале за добивање на европска младинска картичка за попусти и бенифиции, една недела по нејзината промоција во земјава. Директорот на агенцијата за млади и спорт Дарко Каевски, институција која е еден од носителите на проектот, вели дека секојдневно се зголемува листата на домашни компании кои нудат поволности, а тековно се преговара со нови. Од Националната агенција за европски образовни програми и мобилност се надеваат дека европската младинска картичка ќе придонесе и младите од С. Македонија да ги почувствуваат придобивките кои ги добиваат и нивните врсници во Европа.
Аплицирањето одзема неколку минути
Процесот на аплицирање за европската младинска картичка почнува со пополнување на стандардизираниот формулар кој е објавен на mladinskakarticka.mk .
Во формуларот едноставно се внесуваат лични податоци, е-маил и телефон. Дополнителна процедура и посебни упатства има само за прикачување на неопходната фотографија. Едно од барањата е да биде со резолуција од 600×600 пиксели.
Право да аплицираат имаат сите млади на возраст од 15 до 29 години. Картичката е бесплатна, а апликантите од првиот бран ќе ја добијат по 1. јули, по пошта или на одредени локации за подигнување.
Над 300 фирми и установи веќе нудат попуст со картичката
На објавената листа на досега договорени фирми за попусти за младите се наоѓаат автошколи, бутици, берберници, книжари, приватни здравствени установи, спортски центри, туристички агенции и еден приватен факултет. Нивната вкупна бројка засега е нешто повеќе од 300. Попустите се движат од 4 до 30%, на цел асортиман или на одредени услуги. Најголем попуст од 50 отсто, од досега договорените субјекти на младите им понудиле Филхармонија на РСМ и Националната установа Македонска опера и балет.
Но, субјектите со кои досега е постигната соработка се главно од Скопје. Директорот на Агенцијата за млади и спорт Дарко Каевски, за „360 Степени“ убедува дека поволностите за младите ќе стигнат до сите градови.
„ Секоја картичка ќе има жиг, а и секоја договорена компанија во објектот ќе истакне налепница, за да знаат младите каде важат попустите. Ние во следниот период ќе гледаме да се склучат договори со што повеќе фирми. Ги повикувам младите да аплицираат во што поголем број.“, вели Каевски.
Покрај Агенцијата за млади и спорт која го спроведува, носител на проектот е Националната агенција за европски образовни програми и мобилност. Директорката на Агенцијата, Лидија Димова, вели дека младинска картичка не треба да се сфати само како билет за попусти, туку таа треба да понуди и систем на вредности.
„За да се знае дека сигурно ќе се обезбедуваат вредности, сите носители направиле европска асоцијација во која ги поврзуваат младите и за признавање на неформалното образование. Кога ги праќаме младите на каква било размена, тие се враќаат со некое знаење. До 2020 картичката ќе биде дигитална и во неа, практично како во CV ќе влегуваат сите обуки и семинари кои ги посетиле младите. Така многу полесно ќе се фокусираме и кон работодавците. Мора да се води евиденција, бидејќи веќе од младите не се бара само диплома. Ова се првични обиди кои веруваме ќе вродат со плод. Неслучајно, во европските земји со ваква картичка се определуваат поголеми бенефиции на пример за железничкиот транспорт, сето тоа е со цел да се стекнуваат одредени навики.“, вели Димова.
Младинската картичка веќе функционира во 36 земји ширум Европа и ја користат над 5 милиони млади. Националните организации кои ги издаваат картичките се обединети во европска асоцијација и обврзани се да ја промовираат мобилноста, здравиот начин на живот и активно граѓанско учество на младите.