Од кабинетот на Сиљановска-Давкова денеска првично информираа дека претседателката во Берлин се сретнала со директорката за родова и економска инклузија во ЕБОР, иако на фотографиите се гледа дека разговарала со претседателката на Европската банка за обнова и развој. Подоцна грешката беше коригирана
Претседателката Гордана Сиљановска-Давкова денеска на маргините на Конференцијата за обнова на Украина во Берлин се сретнала со претседателката на Европската банка за обнова и развој (ЕБОР), Одил Рено-Басо, но од нејзиниот кабинет испратија соопштение до медиумите во кое информираа дека се сретнала со Барбара Рамбусек, директорка за родова и економска инклузија во ЕБОР.
Во прилог на соопштението од кабинетот на Сиљановска-Давкова испратија и фотографии од средбата на кои јасно се гледа како претседателката разговарала со Рено-Басо, а не со Рамбусек.
„Претседателката Гордана Сиљановска-Давкова, денеска во Берлин, на маргините на Конференцијата за обнова на Украина, оствари средба со Барбара Рамбусек, директорка за родова и економска инклузија во Европската банка за обнова и развој. На средбата беше разговарано за исклучителната важност на посветената реализација на проектите на ЕБОР во земјава, фокусирани на континуиран развој на социо-економските процеси во македонското општество, во согласност со нашата европска стратешка определба. Двете соговорнички ја потенцираа заложбата во промовирањето на родовата еднаквост, како клучен двигател на функционалната одржлива и инклузивна пазарна економија. Во таа насока, претседателката Сиљановска-Давкова, изрази задоволство од успешноста на спроведените политики на ЕБОР во земјава“,
беше наведено во соопштението од кабинетот на претседателката испратено до медиумите во 12:19 часот.
Откако од кабинетот на Сиљановска-Давкова ја увиделе грешката, еден час подоцна, во 13:25 часот, на нејзините официјални профили на социјалните мрежи Фејсбук и Икс, беше објавено дека претседателката се сретнала со претседателката на ЕБОР, Одил Рено-Басо.
Грешката е исправена и во соопштението објавено на официјалната интернет-страница на претседателката.