Откако стана јасно дека главниот проблем за одлука за почетокот на преговори за членство во Европската унија летово е во Германија, премиерот Зоран Заев во четврток во Берлин ќе се сретне со канцеларката Ангела Меркел.
Од неколку изјави на германски пратеници, но и од минатонеделната дебата во Бундестагот за приемот на Северна Македонија во НАТО, стана јасно дека владејачката ЦДУ-ЦСУ, на канцеларката Меркел, сака за оваа тема да се расправа наесен.
За ова во разговор за „360 Степени“ зборуваше Јосип Јуратовиќ, пратеник од СПД, партија која е на власт во Германија, заедно со ЦДУ-ЦСУ.
Г-дин, Јуратовиќ, знаете ли зошто вашите колеги од ЦДУ не сакаат за отворањето на пристапните преговори со Северна Македонија да се разговара пред летото?
Морам да бидам искрен, во разговор со нив ми е тешко да го проценам и оценам нивното однесување – има еден логичен факт, а тоа е дека имаме уште само една седница пред годишните одмори и дека за организирањето на расправата во Бундестагот, едноставно би било тешко да се организира сега, пред годишните одмори, а тоа ниту беше во планот… Оттука, седницата на Советот на ЕУ е на крајот на јуни, колку што знам, а до тогаш треба да се даде известување и тоа е еден од аргументите што од ЦДУ постојано ми го споменуваат и дека со тоа би ја одложиле одлуката до септември, односно расправата во Бундестагот која е неопходна.
Какви се, сепак, шансите, оваа тема да се најде на дневен ред на последната сесија на Бундестагот пред летните одмори, предвидена за неделата од 24 до 28 јуни?
Мислам дека не се големи шансите, но од разговорите со моите колеги и што се однесува до владејачките структури – ние и ЦДУ, ние инсистираме на тоа. Во секој случај набрзо, а тоа не мора да биде на крајот на јуни, а одговорните може сега да се договорат, дека ќе имаме некоја форма на агенда која ќе може да ја објавиме и да кажеме за С. Македонија да знае на што е. Во секој случај, јас вчера разговарав со моите колеги и кажав што е неопходно да се знае – отприлика во кое време и на кој начин ќе се даде зелено светло. Тоа е една страна.
Другата страна е во тоа што се инсистира на тоа да се придржуваме до регата-принципот. Горе-долу, Македонија ги исполни сите услови за да можат да се отворат преговори и не би требало сега повторно да се врзува судбината на Македонија со Албанија, при што мислам дека и на Албанија треба да и се даде зелено светло, зашто сметам дека отворањето на поглавјата не е нивно затворање, ниту пак е влез во ЕУ, туку е почеток на демократски процеси за засилување на институциите, за да може Македонија, која секако го заслужи тоа, да влезе во ЕУ.
Дали по сето ова би можеле да заклучиме дека многу тешко Бундестагот ќе донесе одлуката пред летните одмори?
Како што стојат работите во моментов, логично е дека се трудиме и работиме на тоа, но, како што стојат работите, мислам дека нема. Морам да бидам искрен дека одлука ќе нема пред летото, но мислам дека ќе успееме во септември.
Важите за голем лобист на сите земји од регионот во германскиот парламент, знам дека деновиве доаѓате во Скопје… ќе почувстувате дека меѓу граѓаните на земјите има разочарување од ваквиот однос на Германија кон ова прашање во моментов.
Мене лично ми е многу жал и на Македонија можам само да и порачам дека Германија секогаш ќе биде пријателски настроена кон Македонија и дека ќе се залага за тоа Македонија, С. Македонија да не биде оштетена и, да бидам искрен, и мене не ми е јасно и не верувам дека станува збор за Македонија, туку очигледно, а ова е мое лично мислење, на колегите од ЦДУ не им е јасно како да се однесуваат кон Албанија, зашто ЕУ инсистира на тоа двете земји да влезат во пакет и тука има несогласувања и нејаснотии како да се однесуваат кон едната и кон другата земја, при што јас секогаш велам дека регата-принципот мора да опстои – односно, онаа земја која ги исполнува условите, и се развива доволно за да може да се отворат преговорите, не смее да биде оштетена заради некои други проблеми во соседна држава“, рече Јуратовиќ.